Փաստաբան Տաթևիկ Սողոյանը Փաշինյանի և իր մոր մասնակցությամբ միջադեպում քրեաիրավական տարր չի տեսնում

Փաստաբան Տաթևիկ Սողոյանը հայտարարել է, որ իր մոր և վարչապետ Նիկոլ Փաշինյանի միջև տեղի ունեցած բանավեճում քրեաիրավական տարր չի տեսնում։

«Ասում են՝ մայրիկիդ թևից է քաշել, բայց այստեղ էլ քրեական տարր չեմ տեսնում։ Ինչպես չէի տեսել նաև Մինասյան եղբայրների ձերբակալության դեպքում։ Կարծում եմ՝ իրավաբանական համայնքը, այդ թվում՝ ես, չպետք է լեգիտիմացնենք իրավաբանության գահավիժումը դեպի աբսուրդ»,- նշել է նա։

Սողոյանը նաև հայտնել է, որ զրպարտության և վիրավորանքի մասով քաղաքացիական հայցեր չեն ներկայացվելու։

Անդրադառնալով վարչապետի հայտարարությանը՝ նա ընդգծել է, որ Փաշինյանը, իր խոսքով, սպառնալիքներ չէր հնչեցրել անձամբ իր մոր հասցեին, այլ՝ «տերերի»։

«Գայթակղությունը մեծ է այդ տերերի  մասով հակադարձելու, բայց կսահմանափակվեմ ասելով, որ մայրիկս բավականաչափ ինքնիշխան է իր գործողություններում»,- ասել է փաստաբանը։

Ավելի վաղ հայտնել էինք, որ Նիկոլ Փաշինյանի հետ Արաբկիրում վեճի բռնված կնոջը` թիվ 16 պոլիկլինիկայի մանկաբարձ-գինեկոլոգ, բժշկական գիտությունների թեկնածու Արփինե Սողոյանին պոլիկլինիկայում հորդորել են աշխատանքից ազատման դիմում գրել։ Տեղեկությունը Factor.am-ին հայտնել էր նրա դուստրը։

Հիշեցնենք, որ այսօր Երևանի Արաբկիր վարչական շրջանում այսօր տեղի է ունեցել Նիկոլ Փաշինյանի քարոզարշավը, որի ընթացքում նա սուր բանավեճի է բռնվել մի կնոջ հետ։ Կինը մոտեցել է Փաշինյանին և նրան մեղադրել «հայրենիքը գողանալու» և «մի ամբողջ սերունդ ոչնչացնելու» մեջ։

Ավելի ուշ պարզվել է, որ Փաշինյանին մոտեցած կինը մանկաբարձ-գինեկոլոգ Արփինե Սողոյանն է, որի հարազատ եղբայրը 44-օրյա պատերազմում անհետ կորած փոխգնդապետ բժիշկ Հրանտ Պապիկյանն է: Իսկ Տաթևիկ Սողոյանը Բագրատ արքեպիսկոպոս Գալստանյանի պաշտպանն է։