Կուզեի տեսնել ՀՀԿ-ականների ուղիղ շփումն ընտրողների հետ. Հակոբ Սիմիդյան. ՏԵՍԱՆՅՈՒԹ

Իշխող ուժի քաղաքականությունն է մարդկանց հետ պարբերաբար շփվելը: Այս մասին Factor.am-ի հետ զրույցում անդրադառնալով նոյեմբերի 24-ին վարչապետի պաշտոնակատար Նիկոլ Փաշինյանի նախաձեռնած երթին՝ ասաց Տարածքային  կառավարման և զարգացման փոխնախարար, ՔՊ անդամ Հակոբ Սիմիդյանը:

«Օգտագործելու ենք օրենքով սահմանված երթեր անցկացնելու իրավունքը: Քաղաքական ուժերը կարող են նույն գործիքներն օգտագործել, իսկ մեր դեպքում երթեր, հանրահավաքներ անցկացնելը նորույթ չեն: Հերթական անգամ քաղաքացիների հետ շփվելու առիթ է»,- նշեց ՔՊ անդամը:

Մեր դիտարկմանը՝ ընտրություններին մասնակցող մյուս քաղաքական ուժերը չեն ողջունում մինչ քարոզարշավի մեկնարկը իրենց այդ նախաձեռնությունը, Սիմիդյանը հակադարձեց. «Ես այսօր քայլում էի և տեսա՝ որոշ թեկնածուներ ևս փակցրել են իրենց նախընտրական պաստառները, այսինքն՝ ինչպես մենք, այնպես էլ մյուս ուժերը իրացնում են օրենքով սահմանված իրենց իրավունքները»:

Հակոբ Սիմիդյանը պնդեց՝ իշխող ուժի կողմից վարչական ռեսուրսի կիրառման որևէ դրսևորում չկա: Հակադարձելով այն մեղադրանքներին, որչ վարչապետի պաշտոնակատար Նիկոլ Փաշինյանը Գեղարքունիքի մարզ այցելության ընթացքում ըստ էության քարոզչություն է իրականացրել, մեր զրուցակիցը հիշեցրեց՝ Փաշինյանը վարչապետի պաշտոնում ընտրվելուց հետո հաճախ է մարզեր այցելում:

«Գնացել է մարզեր, գնում է և անպայման գնալու է՝ անկախ ընտրական գործընթացներից: Վարչական լծակի կիրառման մասին խոսելն ինձ համար հասկանալի չէ, եթե ասում են՝ վարչական լծակ է կիրառվել, պետք է ասեն՝ կոնկրետ ոնց»,- շեշտեց Հակոբ Սիմիդյանը:

Անդրադառնալով արդեն քաղաքական մյուս ուժերի կողմից քարոզարշավի անցկացման մեխանիզմներին՝ Հակոբ Սիմիդյանն ասաց՝ իրեն շատ հետաքրքիր կլիներ ՀՀԿ-ականների ուղիղ շփումներն ընտրողների հետ:

Հարցազրույցն ամբողջությամբ՝ տեսանյութում:

Շողիկ Գալստյան