Տնտեսություն
18.05.2026 | 11:132025 թվականի ընթացքում ձևավորված մակրոտնտեսական զարգացումների և ռիսկերի կառավարման ներքո Կենտրոնական բանկը շարունակել է դրամավարկային պայմանների աստիճանական ճշգրտումը, նվազեցնելով քաղաքականության տոկոսադրույքը, ընդհանուր առմամբ, կես տոկոսային, 0.5 տոկոսային կետով։ Այս մասին Կենտրոնական բանկի տարեկան հաղորդումը ներկայացնելիս ԱԺ ֆինանսավարկային և բյուջետային հարցերի հանձնաժողովի նիստի ժամանակ ասաց ԿԲ նախագահ Մարտին Գալստյանը։
ԿԲ նախագահի խոսքով՝ տարին ամփոփել են 6.5% մակարդակի վրա և արդյունքում, չնայած ընթացող աշխարհաքաղաքական զարգացումներին և առկա մեծ անորոշություններին ու ռիսկերին, իրականացված դրամավարկային քաղաքականության արդյունքում և ձեռք բերված համեմատաբար կայուն մակրոտնտեսական միջավայրում 12-ամսյա գնաճը 2025 թվականի տարեվերջին կազմել է 3.3%՝ առավելագույն մոտ գտնվելով նպատակային ցուցանիշին։
«Եվս մեկ հիշեցում մեր մեզ լսողների համար նաև, որ մենք Ազգային ժողովի գործընկերների հետ համատեղ գնաճի թիրախը Կենտրոնական բանկի համար ավելի խստացրեցինք, 4%-ից իջացրեցինք 3%, որը իմ խորին համոզմամբ, երկարաժամկետ հատվածում ռիսկերի կառավարման տեսանկյունից և երկրի բարեկեցության տեսանկյունից շատ կարևոր քայլ էր։
Այժմ անդրադառնամ 2026 թվականի դրամավարկային քաղաքականության հեռանկարներին և այդ շրջանակում կներկայացնեմ նաև ընթացիկ տնտեսական զարգացումները, առկա անորոշություններն ու ռիսկերը և դրամավարկային քաղաքականության համապատասխան նպատակադրումներն ու ուղղությունները։ 2026 թվականի սկզբից զգալիորեն ավելացան անորոշություններն ու ռիսկերը, կապված Մերձավոր Արևելքի հակամարտության շուրջ լարվածության սրման, էներգակիրների գների և դրանց տատանողականության էական աճի և առևտրային ուղիների սահմանափակման հետ»,- նշեց Գալստյանը։
Նրա խոսքով՝ Հայաստանը աշխարհից անմասն չի կարող մնալ։ Այն գնաճային իրավիճակը, որը աշխարհում ստեղծվում է, ազդելու է նաև Հայաստանի վրա․ «Կենտրոնական բանկի հիմնական գործը այս պահի դրությամբ լինելու է հասկանալ, թե գնաճը, որը որ մենք ունենք 5 ու 3 ու ավելի վերև է գնալու, ինքը պայմանավորված է բացառապես առաջարկի գործոններով, ու դրան կարելի է սպասել ու որոշակի ազդակ չտալ, թե եթե կան պահանջարկի գործոններ ներսում՝ ֆիսկալով կամ արտաքինից եկող տուրիզմի աճով, մենք պիտի որոշակի արձագանք ունենանք դրա վրա»։
Մանրամասները՝ տեսանյութում։
