07.09.2026 | 16:09
Իրանի ԱԳՆ-ն արձագանքել է Վենսի՝ պատերազմի վերաբերյալ հայտարարություններին
Միջադեպ ՔՊ քարոզարշավի ժամանակ․ կա ձերբակալված անձ
Հասարակություն
12.05.2026 | 17:52
Պաշտոնական քարոզարշավի 5-րդ օրը միջադեպ է տեղի ունեցել Շենգավիթում, որտեղ քարոզչական հանդիպում էր անցկացնում ՔՊ-ն։ Համացանցում տեսանյութ է տարածվել, որտեղ երևում է՝ ինչպես են իրավապահները բերման ենթարկում տղամարդուն, իսկ նրա հարազատները պնդում են, որ վերջինը դիմադրություն չի ցուցաբերում, և ոստիկանների գործողությունները բռնի են։
ՆԳՆ ոստիկանությունից Factor TV-ի հարցին ի պատասխան հայտնեցին, որ ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքի, ինչպես նաև այդ նպատակով նյութեր կամ առարկաներ տարածելու կասկածանքով 1 անձ ձերբակալվել և տեղափոխվել է Համայնքային ոստիկանության Շենգավիթի բաժին։ Թե, մասնավորապես, ինչ է ասել բերման ենթարկված քաղաքացին, ՆԳՆ-ից չեն հայտնում։
Նշենք, որ ֆեյսբուքյան օգտատեր Արամ Հարությունյանն է տեսանյութ տեղադրել, որտեղ քաղաքացին, մինչ բերման ենթարկվելը, կոշտ ու վիրավորական արտահայտություններով դիմում է Նիկոլ Փաշինյանին՝ ներկայանալով որպես «շենգավիթցի Արտակ» և հայտարարում է, որ սպասում է վարչապետին Շենգավիթում։
«…էդ թռածներիդ կուտոկին հավաքի, արի Շենգավիթ»,- ասում է նա տեսանյութում։
Նա օգտագործում է սպառնալից և վիրավորական ձևակերպումներ՝ ասելով, որ վարչապետին Շենգավիթում «հաճելի ձևերով» են դիմավորելու։ Միաժամանակ տղամարդը կասկած է հայտնում, թե վարչապետը կգա այդ վայր։
Արփի Հակոբյան
