16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
45 մլն դրամ եկամուտ, 5 անշարժ գույք․ ինչ է հայտարարագրել Սրբուհի Գալյանը
Հասարակություն
12.05.2026 | 17:00
Արդարադատության նախարար Սրբուհի Գալյանը 2025 թվականի ընթացքում 45,202,134 ՀՀ դրամ եկամուտ է ունեցել։ Այդ գումարի հիմնական մասը՝ 26,690,752 ՀՀ դրամը, ձևավորվել է արդարադատության նախարարությունից ստացված աշխատավարձից կամ դրան հավասարեցված այլ վճարումներից։ Այս մասին Factor.am-ը տեղեկանում է Գալյանի ներկայացրած տարեկան հայտարարագրի ուսումնասիրությունից։
Հաշվի առնելով, որ «Պետական պաշտոններ զբաղեցնող անձանց վարձատրության մասին» օրենքով նախարարի աշխատավարձի գործակիցը 12 է, իսկ 2025 թվականին պետական պաշտոն և պետական ծառայության պաշտոն զբաղեցնող անձանց բազային աշխատավարձի չափը 83 հազար 200 դրամ է, ստացվում է, որ անցյալ տարի Գալյանի ստացած պարգևավճարները և այլ հավելումները կազմել են շուրջ 13,711,552 ՀՀ դրամ: Սա նշանակում է, որ նախարարը տարվա ընթացքում ստացել է իր հաստիքային աշխատավարձի ավելի քան 114%-ի չափով լրացուցիչ վճարումներ, ինչի արդյունքում նրա ամսական միջին փաստացի վարձատրությունը կազմել է մոտ 2,224,229 ՀՀ դրամ:
Ի դեպ, Սրբուհի Գալյանն ու մյուս նախարարները քննադատության կենտրոնում հայտնվեցին ամիսներ առաջ, երբ պարզվեց, որ միլիոնների հասնող խրախուսումներ են ստացել: Գալյանն առաջինն էր, որը հանրայնացրեց, թե որքան պարգևավճար է ստացել։
Իշխանությունները պնդում են, որ միլիոնավոր դրամների պարգևավճարները տրվել են հակակոռուպցիոն պայքարի շրջանակում: Ի դեպ, այս հավելավճարները վերաբերում են 2025-ի միայն առաջին կիսամյակին։
Ըստ հայտարարագրում ներկայացված տվյալների՝ նախարարն ունի 5 անշարժ գույք, բանկային ավանդներ, պարտատոմսեր, ինչպես նաև ավելի քան 45 միլիոն դրամ ընդհանուր եկամուտ։
2025 թվականի դեկտեմբերի 15-ին Սրբուհի Գալյանը «Յունիբանկ» ԲԲԸ-ում ձեռք է բերել 11,998,005 ՀՀ դրամի պարտատոմսեր։ Այսինքն՝ նա ներդրում է կատարել բանկում՝ հետագայում եկամուտ ստանալու նպատակով։ Բացի այդ, նա 6,500,000 ՀՀ դրամ գումար է տրամադրել «Ադրեսս» ՍՊԸ-ին որպես փոխառություն, այսինքն՝ ընկերությանը պարտքով գումար է տվել։
Տարեվերջին Սրբուհի Գալյանն ունեցել է 2,000,000 ՀՀ դրամի բանկային ավանդ, իսկ բանկային հաշիվներում դրամական միջոցների ընդհանուր մնացորդը կազմել է 3,234,770 ՀՀ դրամ։ Բացի այս, նա հայտարարագրել է 2,900,000 ՀՀ դրամ և 5,300 ԱՄՆ դոլար կանխիկ դրամական միջոցներ։
Սրբուհի Գալյանը նաև «Ակբա Բանկ»-ից ստացել է 12,000,000 ՀՀ դրամ վարկ, 4,446,370 ՀՀ դրամ եկամտային հարկի վերադարձ՝ ՀՀ ՊԵԿ-ից, 1,200,000 ՀՀ դրամ եկամուտ ստացել է նախկին ամուսնուց՝ Պետրոս Մկրյանից, ինչպես նաև 760,872 ՀՀ դրամ աշխատավարձ է ստացել Երևանի պետական համալսարանից։ «Ակբա Բանկ»-ից բանկային ավանդների դիմաց 104,140 ՀՀ դրամ տոկոս է ստացել։
Տարեվերջին նախարարի վարկերի մնացորդը կազմել է 37,229,339 ՀՀ դրամ, որից 31,279,125 դրամը հիփոթեքային վարկ է՝ բնակարանի ձեռքբերման նպատակով։ Վարկերի մարմանն ուղղվել է 5,336,474 ՀՀ դրամ։
Գալյանն անշարժ գույք ունի ինչպես Երևանում, այնպես էլ՝ մարզերում։ 2023-ին նա հողամաս է գնել Կոտայքի մարզի Նաիրի համայնքում, իսկ 2015 թվականին Տավուշի մարզի Դիլիջան քաղաքում գնել է հողամաս և բնակելի տուն, որոնք համատեղ սեփականություն են։ Արդարադատության նախարարը երկու բնակարան էլ ունի Քանաքեռ-Զեյթուն վարչական շրջանում։ Դրանցից մեկը գնվել է 2022 թվականին, մյուսը՝ 2023 թվականին․ այս բնակարանները նա նվիրատվություն է ստացել։
Արփի Հակոբյան
