Դատախազությունը պահանջում է խզել գեներալ Մանվելի կնոջ և «Շանթ»-ի համահիմնադրի՝ Սևանի ափամերձ հողերի վարձակալության պայմանագրերը

Գլխավոր դատախազությունը միջնորդագրեր է ուղարկել «Սևան» ազգային պարկ» ՊՈԱԿ-ի տնօրենին և Շրջակա միջավայրի նախարարության գլխավոր քարտուղարին՝ Սևանա լճի ափամերձ հողամասերի վարձակալության երեք պայմանագիր լուծելու ուղղությամբ միջոցներ ձեռնարկելու համար։ Գլխավոր դատախազությունից հայտնում են, որ ուսումնասիրությամբ արձանագրվել են մի շարք խախտումներ, այդ թվում՝ վարձավճարների փոփոխության ուշ ծանուցումներ և մրցույթների հրապարակման վերաբերյալ տեղեկատվության բացակայություն, ինչի կապակցությամբ հաղորդումներ են ներկայացվել Քննչական կոմիտե։

«Գլխավոր դատախազության պետական շահերի պաշտպանության վարչությունը միջնորդագրեր է ուղարկել «Սևան» ազգային պարկ» ՊՈԱԿ-ի (այսուհետ՝ ՊՈԱԿ) տնօրենին և Շրջակա միջավայրի նախարարության գլխավոր քարտուղարին՝ ՊՈԱԿ-ի և Նազիկ Ամիրյանի միջև 2007 թվականի դեկտեմբերի 26-ին, ինչպես նաև ՊՈԱԿ-ի և Վարշամ Ղարիբյանի միջև 2005 թվականի օգոստոսի 2-ին և 2006 թվականի հունվարի 19-ին կնքված՝ Սևանա լճի ափամերձ հողամասերի վարձակալության պայմանագրերը լուծելու (դադարեցնելու) ուղղությամբ միջոցներ ձեռնարկելու վերաբերյալ:

Գլխավոր դատախազության պետական շահերի պաշտպանության վարչությունը, պետական (համայնքային) շահերի պաշտպանության հայց հարուցելու լիազորության շրջանակում, ուսումնասիրել է ՊՈԱԿ-ի և Նազիկ Ամիրյանի, ինչպես նաև ՊՈԱԿ-ի և Վարշամ Ղարիբյանի միջև կնքված վարձակալության պայմանագրերը և վերաբերելի փաստաթղթերը: Ուսումնասիրությամբ պարզվել է, որ կնքված երեք պայմանագրերը երեք տարի ժամկետով են, սակայն պայմանագրերը շարունակում են գործել՝ անորոշ ժամկետով:

Ուսումնասիրության արդյունքներով պարզվել է նաև, որ վարձակալության պայմանագրերով նախատեսված են եղել հողի կադաստրային արժեքի աճի դեպքում հողատարածքների վարձավճարները փոփոխելու դրույթներ՝ նոր կադաստրային արժեքների մասին վարձակալներին նախօրոք ծանուցելու պայմանով: Մինչդեռ, 2021 թվականի հունվարի 1-ին՝ հողամասերի կադաստրային արժեքների աճի հիմքով վարձավճարների փոփոխության պայմաններում, վարձավճարների փոփոխության վերաբերյալ ծանուցումները վարձակալներին ուղարկվել են 3 տարի ուշացումով:

Բացի այդ, ուսումնասիրությամբ պարզվել է, որ հողամասերի վարձակալության մրցույթների անցկացման մասին հայտարարությունները զանգվածային լրատվության որևէ միջոցով հրապարակված լինելու վերաբերյալ տեղեկատվություն առկա չէ:

Արձանագրված խախտումների կապակցությամբ հանցանքի մասին հաղորդումներ են ներկայացվել Քննչական կոմիտե»,- ասված է հաղորդագրությունում։

Հիշեցնենք, որ Նազիկ Ամիրյանը ԵԿՄ նախկին նախագահ, գեներալ Մանվել Գրիգորյանի այրին է։

Իսկ Վարշամ Ղարիբյանը գործարար է, որը եղբոր՝ Մանվել Ղարիբյանի հետ հիմնադրել և կառավարել է պաղպաղակ ու հրուշակեղեն արտադրող «Շանթ» ընկերությունը, ինչպես նաև նրանց են պատկանել մի շարք այլ բիզնեսներ։ Հետագայում նրանց միջև վեճ է ծագել, և համատեղ գործունեությունը դադարեցվել է։