Դատավոր Ռոբերտ Պապոյանի կարգապահական գործով հաղորդումը ներկայացրել է Էդգար Ղազարյանը. ԱՆ-ն քննության ընթացքում հայտնել էր, որ դատավորի վիճակը բարելավող հանգամանքներ են առկա

Բարձրագույն դատական խորհրդում այսօր տեղի է ունեցել Վերաքննիչ քրեական դատարանի դատավոր Ռոբերտ Պապոյանի վերաբերյալ կարգապահական գործի քննությունը:

Նիստի մի հատվածը դռնփակ է տեղի ունեցել, սակայն դռնբաց հատվածում քննարկման առարկա է դարձել այն հարցը, թե արդյոք վարույթը ԲԴԽ ուղարկելուց հետո ի հայտ են եկել հանգամանքներ, որոնք բարելավում են դատավորի վիճակը, ինչին վարույթը ԲԴԽ տարած Արդարադատության նախարարությունը դրական պատասխան է տվել:

Նշենք, որ Դատական օրենսգրքի 151-րդ հոդվածի 2-րդ մասի համաձայն՝ այն դեպքում, երբ կարգապահական գործի նյութերը Բարձրագույն դատական խորհուրդ ուղարկելուց հետո վարույթ հարուցած մարմնին հայտնի են դարձել հանգամանքներ, որոնք բարելավում են դատավորի վիճակը կամ բացառում նրան կարգապահական պատասխանատվության ենթարկելը, վարույթ հարուցած մարմինը պարտավոր է այդ մասին հայտնել Բարձրագույն դատական խորհրդին:

Մեզ հայտնի դարձավ, որ դատավոր Ռոբերտ Պապոյանի վերաբերյալ հաղորդումը ներկայացրել է քաղաքական գործիչ այժմ՝ «Ուժեղ Հայաստան» դաշինքի պատգամավորի թեկնածու Էդգար Ղազարյանը: Վերջինիս մասնակցությամբ գործերից մեկով Պապոյանն ինքնաբացարկ է հայտնել՝ նշելով, որ Ղազարյանի հետ մտերմություն ունի, սակայն Ղազարյանը սա համարել է ձևական պատճառ ինքնաբացարկ հայտնելու համար և հաղորդում ներկայացրել դատավորի դեմ: Մինչդեռ դատավոր Պապոյանը ներկայացրել է ապացույցներ, որոնք հավաստում են նրանց միջև որոշակի մտերիմ հարաբերությունները:

ԲԴԽ-ն հեռացել է խորհրդակցական սենյակ՝ որոշում կայացնելու:

Արաքս Մամուլյան