ՔԿԾ պետը հրաման է իջեցնում, որ արգելեն տեր հոր մուտքը քրեակատարողական հիմնարկներ. հայր Ռուբեն․ ՏԵՍԱՆՅՈՒԹ

«Հայաստանի Հանրապետության տարածքում բանտային ոլորտը մնացել է առանց հոգևոր խնամքի»,- հրավիրված մամուլի ասուլիսի ժամանակ ասաց Գարեգին Բ կաթողիկոսի որոշմամբ Մասյացոտնի թեմի առաջնորդ նշանակված Ռուբեն քահանա Զարգարյանը։

Հիշեցնենք՝ ավելի վաղ Մայր Աթոռը հայտարարություն էր տարածել այն մասին, որ արգելվել է Հայոց Եկեղեցու կողմից նշանակված եկեղեցականների մուտքը ազատազրկման վայրեր:

«ՀՀ արդարադատության նախարարության Քրեակատարողական ծառայության պետի ապօրինի որոշմամբ արգելվել է Հայոց Եկեղեցու կողմից նշանակված եկեղեցականների մուտքը ազատազրկման վայրեր։ ՔԿՀ պետը փաստացի դադարեցրել է Հայաստանյայց Առաքելական Սուրբ Եկեղեցու քրեակատարողական հիմնարկների հոգևոր ծառայությունը, միևնույն ժամանակ, շրջանցելով Մայր Աթոռը և անտեսելով իրավական կարգավորումները, անհատ եկեղեցականների հետ կնքել է աշխատանքային պայմանագրեր: Այս քայլը իշխանությունների հերթական թիրախավորված ու հակաեկեղեցական արշավն է՝ սահմանափակելու օրենսդրությամբ երաշխավորված Հայոց Եկեղեցու հոգեխնամ առաքելությունը հանրային կյանքում, ինչը դրսևորվել է նաև ՀՀ զինված ուժերում և կրթական ոլորտում։ Նման գործելակերպը կոպիտ միջամտություն է Եկեղեցու ներքին կյանքին և կազմաքանդում է Եկեղեցու կանոնակարգված ու կազմակերպված հովվական ծառայությունը՝ այն դարձնելով անհատական նախաձեռնություն և վարչական կամայականություն։ Եկեղեցու դեմ շարունակվող այսօրինակ ապօրինի գործողությունները տարակույս չեն թողնում, որ իշխող քաղաքական ուժը հակաեկեղեցականությունը վերածել է պետական քաղաքականության, ինչը կործանարար է, որով և՝ խստագույնս դատապարտելի»,- նշվում էր հաղորդագրության մեջ։

Հայր Ռուբենին խոսքով՝ սա նաև բնութագիր է՝ այսօրվա իշխանությունների և այն պետական կառույցների, որոնք շրջանցելով իրենց տրված լիազորություններն ու պարտականությունները սահմանադրությամբ և օրենքներով, կատարում են հրամաններ.

«Քրեակատարողական ծառայությունը պետական կառույց է, դա ինչ-որ կուսակցության կառույց չէ, դա պետական կառույց է, որտեղ Հայաստանյայց Առաքելական Սուրբ Եկեղեցին վերջին 12 տարվա ընթացքում գործել է պայմանագրով, դրանից առաջ՝ բանավոր պայմանավորվածությամբ: Ու ի դեպ, ձեզ ասեմ, առանց չափազանցնելու, քրեակատարողական հիմնարկների հոգևոր ծառայության համար մենք ամբողջությամբ պարտական ենք այսօրվա Ամենայն Հայոց Հայրապետին: Ամբողջությամբ: Անկախանալուց հետո ինքն է ձեռնարկել քահանայի այց՝ նախ Կոշի քրեակատարողական հիմնարկ, ապա նաև մյուս քրեակատարողական հիմնարկները՝ 1993 թվականից սկսած: 2003 թվականին արդեն որպես Ամենայն Հայոց Կաթողիկոս գրասենյակն է հիմնել ծառայությունը, պաշտոնականացրել է, և դրանից մոտավորապես 10-12 տարի հետո նաև պայմանագիրն է կնքվել: Այսինքն՝ հոգևոր ծառայությունը քրեակատարողական հիմնարկներում դա մեծագույն նպաստ է նաև պետությանը, հասարակությանը, մեր ժողովրդին: Հիմա ինչ-որ քմահաճույքներով պետական այդ կառույցը մնացել է առանց հոգևոր սպասարկման, հոգևոր խնամքի»։

Մանրամասները՝ տեսանյութում։