Վեդիում անչափահաս քույրերի հետ կապված գործով նրանց հորեղբայրն ազատ է արձակվել

Վեդիում սեռական բռնության ենթարկված աղջիկների հորեղբայրն ազատ է արձակվել, հայտնել է փաստաբան Ռուբեն Մելիքյանը։

«Ձերբակալման 72 ժամը լրանալու կապակցությամբ Վեդիի երեխաների հորեղբայրը՝ Թովմասը, ուղիղ 15:30-ին ազատ արձակվեց։ Բայց ինտենսիվ քննչական գործողությունները այս պահին դեռ շարունակվում են։ Շուտով կհասկանանք մեղադրանքի հարցը»,- գրել է Մելիքյանը ֆեյսբուքյան իր էջում։

Երեխաների հորեղբայրը, ըստ տեղեկությունների, վնասվածք էր հասցրել տղամարդկանցից մեկին, ինչից հետո նրան ձերբակալել էին։

Նշենք՝ այս գործով 2 անձ կալանավորված է։ Հանրային քրեական հետապնդում է հարուցվել Ա.Ե.-ի նկատմամբ՝ Քրեական օրենսգրքի 198-րդ հոդվածի (Սեքսուալ բնույթի բռնի գործողությունները) 2-րդ մասի 2-րդ և 4-րդ կետերով (խոցելի վիճակում գտնվող անչափահասի նկատմամբ սեքսուալ բնույթի բռնի գործողություններ կատարելը) և Դ.Ա.-ի նկատմամբ՝ Քրեական օրենսգրքի 198-րդ հոդվածի 2-րդ մասի 2-րդ և 4-րդ կետերով (3 դրվագ):

Վեդիում անչափահասների նկատմամբ սեռական բռնության գործի շրջանակում ՆԳՆ-ից և ՔԿ-ից պաշտոնյաներ են աշխատանքից ազատվել, սեփական դիմումի համաձայն աշխատանքից ազատվել է նաև Արարատի մարզի դատախազ Վարդան Պողոսյանը։

Ի դեպ, այս պաշտոնանկությունները տեղի են ունեցել Նիկոլ Փաշինյանի մայիսի 7-ի հայտարարությունից հետո։ Նա, անդրադառնալով Վեդիում քույրերի նկատմամբ սեքսուալ բնույթի բռնի գործողությունների աղմկահարույց դեպքին, նշեց, որ դեպքը բացահայտվել է իրավապահների օպերատիվ աշխատանքի արդյունքում, իսկ անպատասխանատու իրավապահները համակարգից կհեռացվեն։