«Ընտրությունների համար մեկը զանգե, կգամ ձեր գյուղը, ով զանգել է, ծեծ կուդե»․ ՀԿԿ-ի նոր գաղտնալսումը․ ՏԵՍԱՆՅՈՒԹ

Հակակոռուպցիոն կոմիտեն հայտնել է, որ Շիրակի մարզի Անի համայնքում բացահայտվել է ընտրակաշառքի սխեմա, որի շրջանակում «Ուժեղ Հայաստան» կուսակցության տարածքային պատասխանատուն և նրա հետ կապված անձինք ընտրողներին կաշառք են խոստացել և տվել՝ այն քողարկելով որպես աշխատավարձ։ Գործով նախաձեռնվել է քրեական վարույթ, կատարվել են խուզարկություններ, և մի շարք անձինք ձերբակալվել են։

«ՀՀ հակակոռուպցիոն կոմիտեի ծառայողների կողմից իրականացրած օպերատիվ-հետախուզական միջոցառումների արդյունքում փաստական տվյալներ են ստացվել այն մասին, որ «Ուժեղ Հայաստան» կուսակցության Շիրակի մարզի Անի համայնքի տարածքային պատասխանատուն, իր մերձավոր ազգականների և այլ անձանց հետ 2026 թվականի հունիսի 7-ին կայանալիք Ազգային ժողովի ընտրություններին իրենց կուսակցության օգտին քվեարկելու պայմանով մի շարք ընտրողների խոստացել, ինչպես նաև տվել են ընտրակաշառք՝ գործընթացը քողարկելով նշված անձանց կուսակցության տարածքային գրասենյակներում որպես պատասխանատու կամ ակտիվիստ ձևակերպելու և կաշառք–գումարը աշխատավարձի տեսքով վճարելու անվան տակ:

Բացի այդ, «Ուժեղ Հայաստան» կուսակցության անունից հանդես եկող անձը նյութապես շահագրգռելու, ինչպես նաև քրեական աստիճանակարգության բարձրագույն կարգավիճակ պահպանող անձանց անունից տրված պահանջին չենթարկվելու հետևանքներով վախեցնելու սպառնալիքով փորձել է խոչընդոտել մի շարք ընտրողների ընտրական իրավունքի ազատ իրականացմանը:

Դեպքի առթիվ ՀՀ հակակոռուպցիոն կոմիտեում նախաձեռնվել է քրեական վարույթ, ձերբակալվել են մի շարք անձինք, կատարվել են խուզարկություններ և վարութային այլ գործողություններ»,- ասված է ՀԿԿ-ի տարածած հաղորդագրությունում։