14.07.2026 | 15:46
Կրեմլն Ուկրաինայի հակամարտության վերաբերյալ Ալիևի դիրքորոշումը «սխալ» է որակել
«Ունենք առաջարկը, չենք ընդունում»․ Ղազինյանը՝ ՀԷՑ-ը 380,000 դոլարով գնելու Կառավարության առաջարկի մասին
Քաղաքականություն
08.05.2026 | 14:05
«Ունենք այդ առաջարկը, չենք ընդունում»․ լրագրողների հետ զրույցում հայտարարել է «Ուժեղ Հայաստան» կուսակցության անդամ, ՀԷՑ-ի գլխավոր տնօրենի նախկին ԺՊ Դավիթ Ղազինյանը։
«Ազատություն» ռադիոկայանն օրեր առաջ գրել էր, որ ՀՀ կառավարությունը «Հայաստանի էլեկտրական ցանցեր» ընկերության ձեռքբերման համար բաժնետերերին՝ Սամվել Կարապետյանի ընտանիքին առաջարկել է շուրջ 23,3 միլիարդ դրամ՝ 62 մլն 300 հազար դոլար, պայմանով, որ Կարապետյանն ընկերությանը վերադարձնի վերջին տասը տարիներին ստացած շահաբաժինները՝ 23 մլրդ 158 մլն դրամը։ Փաստացի, եթե սեփականատերն իր ստացած շահաբաժինները վերադարձնի ընկերությանը, Կառավարության՝ ՀԷՑ-ի բաժնետոմսերի համար առաջարկը կկազմի 142 մլն դրամ՝ 380 000 դոլար։
«Ինձ էլ են ասել, որ համապատասխան փաստաթուղթն արդեն լրագրողների ձեռքում է։ Մենք չէինք ցանկանում դա հրապարակել՝ հաշվի առնելով շատ հանգամանքներ։ Հերթական անգամ պետության վերաբերմունքն է մասնավորի բիզնեսի նկատմամբ։ Նարեկ Կարապետյանը շատ ճիշտ է անում, որ չի անդրադառնում այդ թեմային։ Ինչպես բազմիցս ես նշել եմ՝ Սամվել Կարապետյանը բացարձակ խնդիր չունի իր ունեցվածքը պաշտպանելու։ Տեսնելով երկիրն ուր է գնում և ինչ վիճակում է, այստեղ խոսել ՀԷՑ-ի կամ իր կորցրածի կամ բանակցությունների մասին, կարծում եմ, ճիշտ չի»,- ասել է նա։
Հիշեցնենք՝ Նիկոլ Փաշինյանն ավելի վաղ հայտարարել էր, որ գնից է կախված՝ Կառավարությունը կգնա ՀԷՑ-ը պետական բյուջեի միջոցներով գնելու տարբերակո՞վ, թե՞ մասնավորեցման ուղով․ «Իսկ գինը պետք է որոշվի համակողմանի վերլուծության արդյունքում։ Եթե դա կլինի տրամաբանական գին, շատ լրջորեն կքննարկվի, եթե շատ մեծ լինի գինը և ակնհայտ կլինի, որ պետական բյուջեի միջոցներով մենք չենք կարող այդ ձեռքբերումն իրականացնել, կգնանք երկրորդ սցենարով»։
Եվգենյա Համբարձումյան
