Վեդիում անչափահաս քույրերին առնչվող գործով երկու անձի ձերբակալելու որոշում է կայացվել. ՔԿ

Վեդիում անչափահաս քույրերին առնչվող գործով երկու անձի՝ Ա.Ե.-ի և Դ.Ա.-ի վերաբերյալ կայացվել է ձերբակալման որոշում։ Այս մասին Factor.am-ին հայտնեցին ՔԿ-ից։

Վեդիում անչափահաս քույրերի նկատմամբ տեղի ունեցած առերևույթ դեպքի կապակցությամբ դատախազը հանրային քրեական հետապնդում է հարուցել Ա.Ե.-ի նկատմամբ՝ Քրեական օրենսգրքի 198-րդ հոդվածի (Սեքսուալ բնույթի բռնի գործողությունները) 2-րդ մասի 2-րդ և 4-րդ կետերով (խոցելի վիճակում գտնվող անչափահասի նկատմամբ սեքսուալ բնույթի բռնի գործողություններ կատարելը) և Դ.Ա.-ի նկատմամբ՝ Քրեական օրենսգրքի 198-րդ հոդվածի 2-րդ մասի 2-րդ և 4-րդ կետերով (3 դրվագ): Այս մասին Factor.am-ին տեղեկացրել էին ՀՀ գլխավոր դատախազությունից։

«Երեխաներին փորձել են ուժով, համոզելով նստեցնել մեքենան»,- փաստաբան Վարդուհի Էլբակյանը հրավիրված մամուլի ասուլիսի ընթացքում անդրադարձել է Վեդի համայնքում երկու անչափահաս քույրերի նկատմամբ իրականացված ենթադրյալ սեքսուալ բնույթի բռնությունների դեպքին։ Նա խիստ քննադատել է իրավապահ համակարգի և սոցիալական ծառայությունների աշխատանքը՝ պնդելով, որ երեխաների շահերը պատշաճ չեն պաշտպանվել։ Նրա խոսքով՝ գործով ամիսներ շարունակ չեն իրականացվել անհրաժեշտ քննչական գործողություններ, և մինչև այժմ կալանավորված անձինք չեն եղել։

Փաստաբանը նաև նշել է, որ դեպքի վերաբերյալ հանրությունը տեղեկացել է լրագրողական հրապարակումից հետո, իսկ տուժած ընտանիքը, լինելով սոցիալապես խոցելի, չի գտնվել համապատասխան պետական մարմինների ուշադրության կենտրոնում։

Էլբակյանի խոսքով՝ իրավիճակը հանգեցրել է նաև ինքնադատաստանի դեպքի․ երեխաների հորեղբայրը հարձակվել է ենթադրյալ կասկածյալներից մեկի վրա և այժմ ինքն է ձերբակալված, մինչդեռ գործով անցնող անձինք երկար ժամանակ մնացել են ազատության մեջ։