Չե՞նք կարա Նարեկով էդ հարցը լուծենք` մեծ փող վերցնենք, «Ֆորա բանկ»-ի բանը քրոջ տղեն ա. ՀԿԿ-ն «Ուժեղ Հայաստանին» առնչվող նոր ձայնագրություն է հրապարակել․ ՏԵՍԱՆՅՈՒԹ

Հակակոռուպցիոն կոմիտեն «Ուժեղ Հայաստան» կուսակցությանն առնչվող նոր ձայնագրություն է հրապարակել։ Ըստ կոմիտեի՝ պարզվել է, որ «Ուժեղ Հայաստան» կուսակցության անունից հանդես եկող անձը նախնական պայմանավորվածություն է ձեռք բերել Ռուսաստանի Դաշնությունում բնակվող, ազգությամբ հայ քաղաքացու հետ՝ Հայաստանի քաղաքացիների կողմից իրենց օգտին քվեարկությունն ապահովելու վերաբերյալ։

Փոխարենը ռուսաստանաբնակ քաղաքացուն խոստացվել է կուսակցության ղեկավար կազմի միջոցով աջակցել՝ «Տաշիր» ընկերությունների խմբին պատկանող և Ռուսաստանի տարածքում գործող բանկից արտոնյալ պայմաններով վարկ ստանալու գործընթացում։

Քրեական վարույթի շրջանակում վերծանված հեռախոսազրույցներից մեկում կողմերը խոսում են «պադերժկա» ապահովելու, տարբեր ընտանիքների միջոցով ձայներ հավաքելու և ընտրություններին ակտիվ մասնակցություն կազմակերպելու մասին։ Նշվում է, որ մեկ անձ կարող է ազդեցություն ունենալ տասնյակ ընտանիքների վրա, իսկ ընդհանուր հաշվարկներով խոսվում է հարյուրավոր, անգամ հազարավոր ձայների ապահովման մասին, մասնավորապես՝ Արարատի մարզում։

Մեկ այլ զրույցում քննարկվում են ֆինանսական հարցեր՝ փոխադարձ աջակցություն տրամադրելու համատեքստում։ Խոսքը վերաբերում է բանկային հնարավորություններին, խոշոր գումարների շրջանառությանը։

«Ասում ա՝ իրանց ձեռն ա, ասում ա՝ ախպերս տենց-տենց ա, արա ասում ա՝ դե ճանաչում ա բանին, ջոկի՞ր ախպեր անունը ինչ ա, դե էդ Ֆորա բանկի բանը քրոջ տղեն ա, հա՞: Հիմի չարխերը կա, ջոկո՞ւմ ես, մենք իրանց պիտի օգնենք, իրանք էլ մեզ: Մենք չենք կարա՞ Նարեկով էդ հարցը լուծենք, մեծ փող կարելի ա վերցնել ու սաղ պրծնեմ սաղ: Ասա՝ ախպեր, մեր ախպերը մեր համար լիքը չարխեր ա անում, ասա հա՞, օգնենք ախպերն ինքն էլ ընդեղ ա, սա ստրոյկա ա վերցրել մեծ, ախպեր, էնպես չի, որ իրան ասում ենք՝ մեզ պարտքով փող տա, Սա՛մ, ջոկի՞ր»,- ասվում է ձայնագրությունում։

Հակակոռուպցիոն կոմիտեն կոչ է անում արտերկրում բնակվող Հայաստանի Հանրապետության քաղաքացիներին որևէ պարագայում չներգրավվել ընտրական իրավախախտումների մեջ՝ նյութական կամ այլ շահի դիմաց։

Միևնույն ժամանակ, իրավապահ կառույցը զգուշացնում է, որ նման բոլոր դեպքերը գտնվում են մշտական վերահսկողության ներքո և անխուսափելիորեն կարժանանան խիստ ու համարժեք իրավական արձագանքի։

Մանրամասները՝ տեսանյութում։