04.09.2026 | 20:47
Բաքուն արևմտյան հայտնի լրատվամիջոցներին մեղադրում է Ադրբեջանի դեմ ապատեղեկատվական արշավի կազմակերպման մեջ
«Քո արվեստը դպրոցում». 50 արվեստագետ հնարավորություն կունենա կյանքի կոչելու իր նախագիծը
Մշակույթ
21.11.2018 | 16:25
Ամփոփվել են ՀՀ մշակույթի, ՀՀ կրթության և գիտության նախարարությունների համատեղ նախաձեռնած «Քո արվեստը դպրոցում» դրամաշնորհային ծրագրի արդյունքները: Ներկայացված նախագծերի և բոլոր դիմողների հետ կազմակերպված հարցազրույցների արդյունքում՝ ընտրվել են կերպարվեստի, գրականության և երաժշտության ոլորտներում ներգրավված 50 արվեստագետ և տեսաբան, ովքեր վիճակահանության արդյունքում հնարավորություն են ստացել կյանքի կոչելու իրենց նախագծերը շուրջ 1400 հանրակրթական դպրոցներում /յուրաքանչյուր մասնակիցը՝ 30 դպրոցում/:
Նախագծի վերջնական ընտրության հարցում որոշիչ են եղել ներկայացված նախագծի համապատասխանությունը «Քո արվեստը դպրոցում» ծրագրի բովանդակային և մեթոդական հիմնական չափորոշիչներին՝ նորարարություն, ինտերակտիվ ստեղծագործական մոտեցում, ներառականություն, շարունակականությունն ապահովելու հնարավորություն:
Ներգրավելով դպրոցականներին և ժամանակակից արվեստագետներին ստեղծագործական երկխոսության մեջ, «Քո արվեստը դպրոցում» ծրագիրը բացառիկ հնարավորություն է ստեղծում վերարժևորելու արվեստի հետ կենդանի հաղորդակցման կարևորությունը ժամանակակից թվային տեխնոլոգիաների ժամանակաշրջանում, ինչպես նաև խթանելու միջսերնդային ճանաչողությունը և համագործակցությունը: Ծրագիրը միտված է դպրոցներում այլընտրանքային կրթության նորարարական հարթակ դառնալուն՝ նպաստելով արվեստի միջոցով երեխաների քննադատական, վերլուծական ու ստեղծարար մտքի ձևավորմանն ու զարգացմանը:
Ծրագրի առաջին դաս-հանդիպումը տեղի կունենա նոյեմբերի 22-ին` ժամը 15:00-ին, Երևան քաղաքի Վարդանանց ասպետներ հիմնական դպրոցում, գեղանկարիչ Պետիկ Պետրոսյանի մասնակցությամբ: Հանդիպմանը ներկա կգտնվեն նաև ՀՀ մշակույթի նախարարի պաշտոնակատար Լիլիթ Մակունցը և ՀՀ կրթության և գիտության նախարարի պատոնակատար Արայիկ Հարությունյանը:
«Քո արվեստը դպրոցում» դրամաշնորհային ծրագրի մրցույթի արդյունքում հաղթած մասնակիցների ցանկ:
