27.07.2026 | 13:18
Պուտինը պատրաստվում է մոբիլիզացիայի, նա պատրաստ չէ դադարեցնել այս պատերազմը. Զելենսկի
Պատրաստ ենք ԱՄՆ-ի և Ռուսաստանի հետ բանակցություններին Ադրբեջանում. Զելենսկի
Քաղաքականություն
25.04.2026 | 16:15
Ուկրաինայի նախագահ Վլադիմիր Զելենսկին, 2019 թվականից ի վեր առաջին անգամ Ադրբեջանում Իլհամ Ալիևի հետ հանդիպման ժամանակ, հայտարարել է, որ պատրաստ են այդ երկրում անցկացնել եռակողմ բանակցություններ՝ ԱՄՆ-ի և Ռուսաստանի մասնակցությամբ․ «Մենք պատրաստ ենք եռակողմ բանակցությունների։ Մենք նման բանակցություններ ունեցել ենք Թուրքիայում, մեր ամերիկացի գործընկերների հետ՝ Շվեյցարիայում։ Իհարկե, պատրաստ ենք մոտակա բանակցություններին Ադրբեջանում, եթե Ռուսաստանը պատրաստ լինի դիվանագիտության»։
Երկրի ղեկավարները լրատվամիջոցներին նաև հայտնել են, որ Ուկրաինան և Ադրբեջանը ստորագրել են վեց համաձայնագիր անվտանգության և առևտրաշրջանառության ոլորտներում։ Բացի այդ, երկու երկրների առաջնորդները քննարկել են համագործակցության ընդլայնումը, այդ թվում՝ էներգետիկայի և գյուղատնտեսության ոլորտներում, նշված է Ադրբեջանի նախագահի կայքում։
Ադրբեջան այցի ընթացքում Զելենսկին հանդիպել է նաև ուկրաինական փորձագիտական թիմի հետ, որը կիսվում է «երկնքի պաշտպանության փորձով»։
Հիշեցնենք՝ փետրվարի 28-ին ԱՄՆ-ի և Իսրայելի կողմից Իրանի դեմ պատերազմի սկսվելուց հետո ամերիկյան, ռուսական և ուկրաինական պատվիրակությունների միջև եռակողմ բանակցությունները փաստացի դադարեցվել են։ Դա պայմանավորված է ոչ միայն Իրանի հետ հակամարտության վրա ԱՄՆ-ի կենտրոնացմամբ, այլև նրանով, որ Ուկրաինայի հարցով բանակցողներ՝ ԱՄՆ նախագահի հատուկ բանագնաց Սթիվեն Ուիտկոֆը և Դոնալդ Թրամփի փեսա Ջարեդ Քուշները ներգրավվել են Թեհրանի հետ բանակցություններում։ Բացի այդ, ընդհանուր առմամբ Մերձավոր Արևելքում իրավիճակի սրացումը, որտեղ էլ նախատեսվում էր եռակողմ հանդիպումը, նույնպես հանգեցրել է բանակցությունների դադարեցմանը։
Միևնույն ժամանակ, ուկրաինական բանակցային պատվիրակության անդամ, նախագահի գրասենյակի ղեկավար Կիրիլ Բուդանովի խոսքով՝ Մոսկվան և Կիևը մոտենում են խաղաղության համաձայնագրի, և պատերազմի կարգավորումը կարող է շատ ժամանակ չխլել։ Ապրիլի սկզբին նա նշել էր, որ թեև մինչ այժմ և՛ Ուկրաինան, և՛ Ռուսաստանը բանակցություններում պահպանում էին «մաքսիմալիստական» դիրքորոշումներ, կողմերը կմոտենան փոխզիջման որոնման ընթացքում։
