25.10.2026 | 09:46
Ստեղծվել է իրավիճակային վերլուծությունների կենտրոն. ԿԸՀ
ԿԿՀ-ն Տիգրան Արզաքանցյանին բանավոր դիտողություն է հայտարարել
Քաղաքականություն
22.04.2026 | 17:25
Կոռուպցիայի կանխարգելման հանձնաժողովը վարչական վարույթ է հարուցել «Ուժը Հայրենյաց» կուսակցության նախագահ Տիգրան Արզաքանցյանի նկատմամբ՝ կուսակցության 2023 և 2024 թվականների ֆինանսական միջոցների աղբյուրների և ծախսերի, ինչպես նաև գույքի մասին տարեկան հաշվետվություններում մի շարք անհամապատասխանությունների և ոչ ամբողջական տվյալներ ներկայացնելու համար։
Հայտարարագրում կուսակցության ղեկավար մարմնի անդամների վերաբերյալ տեղեկությունը բացակայել են, բանկային քաղվածքներում զրոյական շարժի պայմաններում հաշվետվություններով գումարի մուտքեր և ելքեր են արտացոլված եղել, անկանխիկ հաշվարկների պահանջների հնարավոր խախտումներ են եղել, ինչպես նաև ԶԼՄ հրապարակումներով լուսաբանված միջոցառումների ֆինանսական ծախսերը արտացոլված չեն եղել հաշվետվություններում:
Վարույթի ընթացքում հանձնաժողովի կողմից պահանջվող տեղեկատվությունը հանձնաժողով է ներկայացվել։ Ըստ Վարչական իրավախախտումների վերաբերյալ օրենսգրքի համապատասխան դրույթների, եթե անձը հայտարարագիրը ներկայացնում է վարչական վարույթի հարուցումից հետո՝ մինչև վարչական տույժ նշանակելու մասին որոշման կայացումը, ապա վարույթը ենթակա է կարճման։
Տիգրան Արզաքանցյանը հանձնաժողովին ներկայացրել է նաև գրավոր բացատրություն, որում նշել է, որ հայտարարագիրը ժամանակին չներկայացնելը չի եղել միտումնավոր կամ անբարեխիղճ վերաբերմունքի արդյունք։ Որպես պատճառ նշվել է կուսակցական ակտիվ գործունեությունը և աշխատանքային խիստ ծանրաբեռնվածությունը, ինչի պատճառով հնարավոր չի եղել պատշաճ հետևել հայտարարագրման տեխնիկական գործընթացին։
«․․․Կուսակցության վարչության նախագահի կողմից թույլ տրված իրավախախտումը նվազ նշանակության գնահատելիս հաշվի է առնում նաև այն, որ կուսակցության ֆինանսական միջոցների աղբյուրների և ծախսերի, ինչպես նաև գույքի մասին տարեկան հաշվետվությունների հավաստիությունը ստուգելու նպատակով Հանձնաժողովի կողմից պահանջվող փաստաթղթերն ու տեղեկատվությունը օրենքով սահմանված կարգով և ժամկետում հանձնաժողով չի ներկայացվել առաջին անգամ»,-նշվում է ԿԿՀ որոշման մեջ:
«Ուժը Հայրենյաց» կուսակցության նախագահ Տիգրան Արզաքանցյանն ազատվել է վարչական պատասխանատվությունից, նրան բանավոր դիտողություն է հայտարարվել։
Եվգենյա Համբարձումյան
