Դեղերի վրա նախկինում ծախսվող գումարը կարելի է ծախսել օրապահիկի վրա․ Փաշինյանը՝ Լառնակա մեկնողներին. ՏԵՍԱՆՅՈՒԹ

Վերջին օրերին շատ բուռն քննարկումների տեղիք է տալիս իմ այն արտահայտությունը, թե ապրիլի 1-ից ավելացված թոշակով մեր թոշակառուները կարող են դեպի Լառնակա ինքնաթիռի տոմս գնել, որովհետև տոմսերի արժեքները տատանվում են 2-15 եվրոյի սահմաններում։ Այս մասին ֆեյսբուքյան իր էջի ուղիղ եթերում նշեց վարչապետ Նիկոլ Փաշինյանը։

«Վերջին շրջանում, երբ որ մենք մարզերով այցելություններ ենք անում, բազմաթիվ թոշակառուներ մեզ ասում են հետևյալը, որ մենք նախկինում 30, 40 հազար դրամ ծախսում էինք դեղերի վրա, իսկ այժմ առողջության ապահովագրության առկայության պայմաններում այդ գումարները մնում են մեր գրպանում։ Ապրիլի 1-ից 10,000 դրամով ավելացել է կենսաթոշակը, նաև հետվճարի հնարավորություն կա, երբեմն՝ 5000, երբեմն՝ 7000, երբեմն՝ 10,000, այսինքն 20,000 դրամով ակնհայտորեն կարելի է ձեռք բերել 3, 5, 10 եվրոյանոց, 10 եվրոյանոց տոմս, դեպի Լառնակա, օրինակ, և այդ դեղերի վրա նախկինում ծախսված գումարները կարելի է ծախսել օրապահիկի և այլ ծախսերի վրա»,- ասաց նա։

Փաշինյանը կոչ արեց թոշակառուներին, որ նրանք այդ դեղերի գումարները մի կողմ դնեն և առաջիկա ամռան ընթացքում օգտվեն առիթից, սկսեն ճամփորդել։

«Իհարկե այստեղ նաև անհրաժեշտ է որոշակի հմտությունների տիրապետել՝ օնլայն տոմս գնելու, և մենք կարող ենք մտածել այդ մասին արդեն։ Այո, սա կարող է մեր նախորդ պատմության դիտանկյունից շատ տարօրինակ է հնչում, բայց ես մեր այդ խմբի բոլոր թոշակառուներին կոչ եմ անում՝ անպայման մտածել այդ մասին»,- նշեց նա։

Մանրամասները՝ տեսանյութում։