15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
ՆԱՏՕ-ն պատրաստ է անվտանգության ու պաշտպանության ոլորտում Հայաստանի հետ համագործակցության
Քաղաքականություն
22.04.2026 | 15:51
2026 թվականի ապրիլի 20-21-ը ՆԱՏՕ-ի գլխավոր քարտուղարի՝ Կովկասում և Կենտրոնական Ասիայում նոր հատուկ ներկայացուցիչ, դեսպան Քևին Համիլթոնն առաջին այցն է կատարել Հայաստան։ Նրան ընդունել է ՀՀ նախագահ Վահագն Խաչատուրյանը, հանդիպումներ են եղել նաև վարչապետ Նիկոլ Փաշինյանի, Ազգային ժողովի նախագահ Ալեն Սիմոնյանի, արտաքին գործերի նախարար Արարատ Միրզոյանի, պաշտպանության նախարար Սուրեն Պապիկյանի և Անվտանգության խորհրդի քարտուղար Արմեն Գրիգորյանի հետ։ Այս մասին ասվում է ՆԱՏՕ-ի հայտարարության մեջ։
Հաղորդվում է, որ հատուկ ներկայացուցիչը զրուցակիցների հետ մտքեր է փոխանակել մի շարք թեմաների շուրջ, ինչպիսիք են ՆԱՏՕ-ի և Հայաստանի միջև գործընկերության շարունակական զարգացումը, տարածաշրջանային անվտանգությունը, այդ թվում՝ հիբրիդային սպառնալիքները, կապակցվածությունը և Հայաստան-Ադրբեջան խաղաղության գործընթացը:
Դեսպան Համիլթոնը բարձր է գնահատել Հայաստանի շարունակական ներդրումը Կոսովոյում ՆԱՏՕ-ի գլխավորած խաղաղապահ առաքելությունում (KFOR), Հայաստանի զինված ուժերի արդիականացման և ՆԱՏՕ-ի ուժերի հետ դրանց փոխգործունակության մակարդակի բարձրացման ուղղությամբ իրականացվող աշխատանքները։
ՆԱՏՕ-ն պատրաստ է հետագա քաղաքական երկխոսության և անվտանգության ու պաշտպանության ոլորտում համագործակցության Հայաստանի հետ, ասվում է հրապարակված հաղորդագրությունում։
Այցի ընթացքում դեսպան Համիլթոնը նաև հանդիպել է Հայաստանի քաղաքացիական հասարակության և դաշնակից երկրների դեսպանատների ներկայացուցիչների հետ։
Թարգմանությունը՝ Էմմա Չոբանյանի
