14.09.2026 | 11:45
«Փարքինգի նոր տրամաբանություն քննարկեք, որ ինչ-որ միջին մակարդակի չինովնիկներ սև փող չաշխատեն»․ Ավինյան. ՏԵՍԱՆՅՈՒԹ
Հայաստանում ոստիկանության բարեփոխումները չեն փարատել ուժի չարաշահման և անպատժելիության մտահոգությունները. Amnesty International
Քաղաքականություն
21.04.2026 | 21:25
Amnesty International-ի վերջին զեկույցում անդրադարձ կա Հայաստանում իրականացված ոստիկանության բարեփոխումները։ Նշվում է, որ այդ բարեփոխումները, այդ թվում՝ 2024 թվականին հավաքների վերահսկման բարելավման նպատակով նոր օրենքի ընդունումը, չեն կարողացել փարատել ցույցերի ընթացքում անհամաչափ ուժի կիրառման և ոստիկանության անպատժելիության վերաբերյալ մտահոգությունները։
Զեկույցում առանձնահատուկ ուշադրություն է հրավիրվում 2024 թվականի մայիս-հունիս ամիսներին տեղի ունեցած հակակառավարական բողոքի ակցիաներին՝ արձանագրելով, որ հենց այդ ժամանակահատվածում առավել տեսանելի են եղել մարդու իրավունքների խախտումները։
Amnesty International-ը փաստում է, որ թեև առկա են ոստիկանության կողմից ապօրինի ուժի կիրառման բազմաթիվ ապացույցներ, հետագա քրեական վարույթներ հարուցվել են միայն ցուցարարների դեմ։ Ըստ զեկույցի՝ քրեական հետապնդման է ենթարկվել, ընդհանուր առմամբ, 16 ցուցարար, մինչդեռ որևէ ոստիկան պատասխանատվության չի ենթարկվել։
Կազմակերպության գնահատմամբ՝ այս իրավիճակը վկայում է, որ ոլորտում իրականացվող օրենսդրական ու ինստիտուցիոնալ փոփոխությունները դեռևս չեն ապահովել ոստիկանության գործողությունների նկատմամբ բավարար հաշվետվողականություն։
Հիշեցնենք՝ 2025-ի ապրիլի զեկույցում Amnesty International-ը նշել էր, որ ապրիլին և մայիսին վարչապետի հրաժարականը պահանջող բողոքի ցույցերի ժամանակ ոստիկանությունը մի քանի անգամ անօրինական ուժ է կիրառել ցուցարարների նկատմամբ։
Հունիսի 12-ին Երևանի կենտրոնում ոստիկանության և ցուցարարների միջև բախումներ են տեղի ունեցել սահմանի սահմանազատման համաձայնագրի դեմ բողոքի ցույցերի ժամանակ։ 101 մարդ վիրավորվել է, այդ թվում՝ 17 ոստիկան, 98 մարդ, ըստ տեղեկությունների, ձերբակալվել է։ Առնվազն 15 անձ հետագայում մեղադրվել է խուլիգանության և հասարակական կարգը խախտելու մեջ։ Ոստիկանության արձագանքի համաչափության և օրինականության վերաբերյալ հետաքննությունից հետո իրավապահ մարմնի ոչ մի աշխատակցի մեղադրանք չի առաջադրվել։
