12.09.2026 | 23:46
Գյումրիում 64-ամյա տղամարդը դանակահարել է հարևաններին՝ հորն ու որդուն․ որդին մահացել է
Անցած տարվա ծնունդի նվերն է հեռուստացույցը, որը չէի կարողացել տալ. Գոհար Ղումաշյան. ՏԵՍԱՆՅՈՒԹ
Քաղաքականություն
21.04.2026 | 20:43
«Ուժեղ Հայաստան» դաշինքի ներկայացուցիչ Գոհար Ղումաշյանը, անդրադառնալով համացանցում տարածված իր գաղտնալսված հեռախոսազրույցին և դրա շուրջ հարուցված քրեական վարույթին, կատարվածը որակել է որպես ուղղորդված ճնշում։
«Ես և ոչ միայն ես, մեր հայ ժողովուրդը մեկնաբանում են դա որպես քաղաքական հետապնդում։ Իմ գործը որևէ առնչություն չունի ընտրական գործընթացների հետ։ Ռեպրեսիաների լուրջ մեքենա է աշխատում մեր դեմ»,- շեշտեց նա։
Խոսելով 103-ամյա վետերանին հեռուստացույց կամ գումար նվիրելու դրվագի և ընտրակաշառքի մեղադրանքների մասին՝ նա պարզաբանել է, որ դա նախորդ տարվա խոստում է եղել, որն իրականացնելիս խորհրդակցել է իրավաբանների հետ.
«Այո՛, ես խոստացել եմ, որ հեռուստացույց եմ նվիրելու, այո՛, հեռախոսազանգի մեջ ասել եմ, որ եթե հեռուստացույցի կարիք չունի, դրա փոխարեն գումար կարող եմ նվիրել։ Բայց իրավաբաններն ինձ դա թույլ չեն տվել անել, և ես այցելել եմ տիկին Ռոզալիայի տուն և գնացել եմ միայն քաղցրավենիքով։ …Նույնիսկ այն խոսակցությունը, որը ընտրական գործընթացների հետ կապ չունի, իրենք կարող են վերագրել որպես ընտրակաշառք»։
Անդրադառնալով առաջիկա ընտրություններին՝ նա վստահություն է հայտնել, որ իրենց քաղաքական ուժը հասնելու է հաջողության։
«Հայաստանի քաղաքացիները շատ վաղուց սպասել են փոփոխությունների, սպասել են նոր ուժի, որին կարող են վստահել։ Ի վերջո, այդ ուժը եկել է. «Ուժեղ Հայաստան» դաշինքն այն ուժն է, որն ի զորու է բերել մեր երկրին փոփոխությունների։ Եվ մենք դա անելու ենք հաջորդ վարչապետ Սամվել Կարապետյանի հետ»,- եզրափակել է նա։
Մանրամասները՝ տեսանյութում։
