Ամիրյան փողոցը «Պապ թագավորի» անունով փոխելը պիտի բոլորի հետ քննարկվե՞ր․ նախաձեռնության հեղինակ․ ՏԵՍԱՆՅՈՒԹ

Երևանի ավագանու «Ազգային առաջընթաց» խմբակցության անդամ Հայկ Գրիգորյանը, անդրադառնալով իր հեղինակած Ամիրյան փողոցը «Պապ թագավորի» անունով փոխելու նախագծի քննարկումներին, ասաց, որ հանձնաժողովում այն ստացել է դրական եզրակացություն։

«Էդ հանձնաժողովի մեջ եղած ավագանու անդամները ներկայացնում են բոլոր խմբակցությունները: Ընթացակարգ չկա, որով նախագծի հեղինակը պետք է առանձին-առանձին գնա խմբակցությունների հետ քննարկի»,- ասաց Գրիգորյանը։

Նա իր հերթին քննադատեց ընդդիմադիր գործընկերների պահվածքը՝ այն որակելով «միջանձնային պատճառներով պայմանավորված»։

«Սա ավագանու դահլիճ է, ոչ թե մանկապարտեզ, այստեղ պետք է որոշումներ կայացվեն Երևանի համար»,- ընդգծեց նա։

Մեր այն հարցին, թե ինչո՞ւ Պապ թագավորի անունով և ինչու հենց հիմա, Գրիգորյանը պարզաբանեց, որ նախագիծը ներկայացվել է ամիսներ առաջ։ Ըստ նրա՝ օրենքով սահմանված ժամկետների ավարտից հետո քաղաքապետարանի աշխատակազմը պարտավոր էր այն կրկին ներառել նիստի օրակարգում։

Նշենք, որ Հայկ Գրիգորյանը առաջարկում է Կենտրոն վարչական շրջանում գտնվող Արսեն Ամիրյան փողոցն անվանափոխել Պապ թագավորի անվամբ՝ «Պապ թագավորի փողոց»։ Փողոցը սկսվում է Հանրապետության հրապարակից և ձգվում մինչև Սարյան փողոց։ Նախաձեռնության հեղինակ Գրիգորյանը հիմնավորում է, որ Պապ թագավորը հայոց պատմության նշանավոր դեմքերից է, որի կառավարման տարիներին ամրապնդվել է պետականությունը։ Ավագանու այսօրվա նիստին նախագիծը չընդունվեց։

Մանրամասները՝ տեսանյութում։