Այսօր ամենատարածված գողության ձևը ոսկեղենինն է, հալեցնում, վայրկյանների ընթացքում վաճառում են․ Փաշինյան․ ՏԵՍԱՆՅՈՒԹ

Հայաստանի Հանրապետության վարչապետ Նիկոլ Փաշինյանը Հարկ վճարողի օրվա առթիվ հանդիպել է փոքր և միջին ձեռնարկատիրության ներկայացուցիչների հետ: Հանդիպման ընթացքում վարչապետն անդրադարձել է հարկային քաղաքականությանը, պետություն-գործարար հարաբերություններին և պատմականորեն ձևավորված կարծրատիպերի հաղթահարմանը:

Վարչապետն իր խոսքում ընդգծել է, որ հարկային վճարումները պետության կենսունակության միակ երաշխիքն են: «Կա հարկ՝ կա պետություն, չկա հարկ՝ չկա պետություն»,- հայտարարել է նա՝ հավելելով, որ հարկային քաղաքականությունը պետք է ոչ թե ճնշի, այլ խթանի ձեռնարկատերերին՝ ավելի շատ արդյունք ստեղծելու և զարգանալու համար: Ըստ Փաշինյանի՝ պետք է հրաժարվել «խեղճանալու» և «փոքր մնալու» տրամաբանությունից:

Նիկոլ Փաշինյանը խոսել է նաև ստվերային շրջանառության վտանգների մասին՝ որպես օրինակ բերելով ոսկու շուկան և չձևակերպված գործարքները, որոնք նպաստում են հանցավորության աճին:

«Այսօր հանրապետությունում ամենատարածված գողության ձևը ոսկեղենի գողությունն է, և գործերի մի զգալի մասը չի բացահայտվում նաև այն պատճառով, որ ոսկին տարան, հալեցրին ու վայրկյանների ընթացքում վաճառեցին: Եթե մենք մեր քաղաքականությամբ խթանում ենք չձևակերպված շրջանառությունը, մենք գնում ենք «չպետություն» դառնալու ճանապարհով: Մենք պետք է ընտրություն կատարենք՝ ինչ ենք ուզում»,-  ասաց Փաշինյանը:

Նա նշել է, որ կառավարությունը պատրաստ է օգնել տնտեսվարողներին թվային գործիքների ներդրման հարցում, որպեսզի վերջիններս կարողանան լիարժեք օգտվել օրենքով սահմանված հարկային արտոնություններից:

Մանրամասները՝ տեսանյութում։