Հարազատի գերեզմանին է այցելել, նամակ գրել ու այդ արարքն արել․ Փաշինյանը՝ ինքնասպան եղած զինվորի մասին․ ՏԵՍԱՆՅՈՒԹ

Վարչապետ Նիկոլ Փաշինյանը լրագրողների հետ ճեպազրույցի ընթացքում խոսել է Զինված ուժերում վերջին շրջանում տեղի ունեցած ողբերգական դեպքերի և ինքնասպանությունների մասին՝ նշելով, որ խնդիրը խորքային է և առնչվում է հանրության հոգեբանական դիմակայունությանը։ 

Անդրադառնալով վերջին դեպքին՝ վարչապետը հայտնեց, որ զինծառայողը թողել է նամակ, որտեղ նշել է, որ զորամասում որևէ խնդիր չունի։ Ըստ Փաշինյանի՝ զինվորը մահվանից երկու օր առաջ այցելել է հարազատի գերեզմանին, ով նույնպես, ըստ նախնական տվյալների, ինքնասպանություն էր գործել։

«Երկու օր առաջ թույլտվություն է վերցրել և այցելել է հարազատի գերեզմանին։ Եկել է զորամաս, նամակ է գրել ու այդ արարքը թույլ է տվել»,- ասաց Փաշինյանը՝ հավելելով, որ ներողություն է խնդրում հարազատներից դեպքը բացահայտելու համար։ 

Վարչապետը ընդգծեց, որ Անվտանգության խորհրդի վերջին նիստում հանձնարարական է տվել դուրս բերել ապացուցված ինքնասպանությունների դեպքերը և տեսնել՝ արդյոք կա՞ն կրկնվող հատկանիշներ։

«Պատկերացրեք գաղափարը ինչի մեջ է՝ ենթադրենք X թվով ինքնասպանություն, կա՞ ինչ-որ հատկանիշ, որ բոլոր ինքնասպանություն գործած մեր սիրելի զինվորների կյանքում նույնն է։ Ասենք, օրինակ, սկսած ընտանեկան վիճակից, ամենատարբեր, ինչը կա, մանավանդ եթե մենք ինֆորմացիան ամբողջությամբ վերբեռնենք, արհեստական բանականությունը կարող է ասել՝ նրանք, տվյալ մարդիկ, ունեն ընդհանրություններ»,- ասաց Նիկոլ Փաշինյանը։

Մանրամասները՝ տեսանյութում։