Վրաստանի, Հայաստանի և Ադրբեջանի միջև համագործակցությունն ընդլայնվում է. Հաջիև

Վրաստանի, Հայաստանի և Ադրբեջանի միջև համագործակցության գործընթացն ընդլայնվում է։ Անթալիայի 5-րդ դիվանագիտական ​​ֆորումի շրջանակում «Հարավային Կովկաս. ձևավորվող ռազմավարական կենտրոն» պանելային քննարկմանն այս մասին հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը:

«Մենք կառուցում ենք տարածաշրջանային անվտանգության նոր երկարաժամկետ ճարտարապետություն և ձգտում ենք ապահովել խաղաղություն և անվտանգություն բոլոր երկրների համար։ Համագործակցության այս ուղղությունը ներառում է նաև երկու աշխարհաքաղաքական դաշինքների միջև հարաբերությունների զարգացումը։ Սա ձեռք է բերվել հանրությանը տարածաշրջանային համագործակցության բաց և ներառական մոդել առաջարկելու միջոցով»,- նշել է Հիքմեթ Հաջիևը։

Նա նշել է, որ Հարավային Կովկասում ներկայում ո՛չ լիակատար խաղաղություն է, ո՛չ էլ բացահայտ հակամարտություն։

«Մենք արդեն որոշակի քայլեր ենք ձեռնարկել խաղաղության հասնելու համար, և դա հաստատվեց Վաշինգտոնի գագաթնաժողովում։ Թուրքիան նաև նախաձեռնել է երկու երկրների (Թուրքիայի և Հայաստանի) միջև հարաբերությունների բարելավման գործընթացը։ Սակայն այս նախաձեռնությունները չպետք է մնան միայն թղթի վրա։ Պետք է ձեռնարկվեն գործնական քայլեր և իրական աշխատանք։ Միայն այս կերպ կարելի է վստահություն կառուցել երկու երկրների միջև»,- ասել է Հաջիևը։

Նա նշել է, որ ադրբեջանական ապրանքներն արդեն արտահանվում են Հայաստան, միևնույն ժամանակ, «հայկական ապրանքները սկսել են ներմուծվել Ադրբեջան»։

«Սա կարևոր քայլ է փոխադարձ վստահության կառուցման առումով։ Ընդհանուր առմամբ, մեր երկրների միջև պետք է կառուցվեն հուսալի և կայուն հարաբերություններ»,- ասել է նա։

Նշելով, որ հարևան տարածաշրջաններում ներկայում ընթանում են տարբեր հակամարտություններ, Հաջիևն ասել է․ «ԱՄՆ-ի և Իրանի միջև լարվածությունը, ինչպես նաև ռուս-ուկրաինական պատերազմը ազդում են տարածաշրջանի անվտանգության միջավայրի վրա: Հետևաբար, մենք ակտիվորեն աշխատում ենք անվտանգությունն ապահովելու ուղղությամբ: Թուրքիայի և Վրաստանի հետ համագործակցությունը կարևոր դեր է խաղում այս գործընթացում»։

Ըստ նրա՝ իրական խաղաղության ապահովումը տեղում անվտանգությունն ապահովող հիմնական գործոնն է թե՛ Հայաստանի, թե՛ Ադրբեջանի համար։

Թարգմանությունը՝ Էմմա Չոբանյանի