Սամվել Կարապետյանն ինչ վարքագիծ ունեցել է 2025-ի հունիսին, նույն վարքագիծն ունի այսօր. պաշտպան

Հակակոռուպցիոն դատարանում՝ նախագահությամբ դատավոր Վահե Դոլմազյանի, շարունակվում է «Ուժեղ Հայաստան» կուսակցության առաջնորդ Սամվել Կարապետյանի խափանման միջոցի հարցի քննությունը:

Նախորդ դատական նիստին հանրային մեղադրող Արգամ Դալլաքյանը միջնորդել է 3 ամսով երկարացնել Կարապետյանի նկատմամբ ընտրված խափանման միջոց տնային կալանքը: Հանրային մեղադրողը նշել է, որ ազատության մեջ գտնվելու դեպքում Կարապետյանը կարող է ազդեցություն գործադրել գործով վկաների նկատմամբ:

Այժմ դատարանում դիրքորոշում է հայտնում պաշտպան Արամ Վարդևանյանը: Վերջինս հարց բարձրացրեց, թե ինչի՞ն պետք է խոչընդոտի Կարապետյանը, եթե համարում է, որ իր նկատմամբ հետապնդումը ակնհայտ քաղաքական է:

«Ինչպե՞ս կարող է բացառապես պատշաճ վարքագիծ դրսևորած անձի նկատմամբ խափանման միջոցը երկարացնելու հարց քննարկվել»,- ասաց Վարդևանյանը՝ հիշեցնելով, որ Սամվել Կարապետյանը 10 ամիս անազատության մեջ է, որից հինգ ամիսը՝ Հայ Առաքելական եկեղեցու նկատմամբ իշխանությունների արշավը քննադատելու համար:

«Եկեղեցու ամենամեծ բարերարը ի՞նչ պիտի աներ խրախուսե՞ր, ողջունե՞ր Հայ առաքելական եկեղեցու նկատմամբ միջամտությունը»,- ասաց Արամ Վարդևանյանը:

Պաշտպանը նշեց, որ Կարապետյանն ինչ վարքագիծ դրսևորել է 2025-ի հունիսին, նույն վարքագիծն ունի այսօր: Պաշտպանը նաև հիշեցրեց, որ Սամվել Կարապետյանի նկատմամբ 4 մլրդ դրամ գրավ է կիրառված:

Նշենք, որ նիստին զուգահեռ դատարանի բակում բողոքի ակցիա է, և դատարանի դահլիճից լսելի են քաղաքացիների ձայները պահանջում են ազատ արձակել Սամվել Կարապետյանին:

Արաքս Մամուլյան