26.06.2026 | 10:25
Վենեսուելայում երկրաշարժերի զոհերի թիվը հասել է 235-ի, վիրավորները` 4300-ի
Թրամփը հայտարարել է, որ Իսրայելն ու Լիբանանը համաձայնել են հրադադարի
Քաղաքականություն
16.04.2026 | 22:58
ԱՄՆ նախագահ Դոնալդ Թրամփը ապրիլի 16-ին հայտարարել է, որ Իսրայելն ու Լիբանանը համաձայնության են եկել հրադադար հաստատելու շուրջ։ Նրա խոսքով՝ 10 օր տևողությամբ հրադադարի ռեժիմը կմտնի ուժի մեջ ապրիլի 17-ի գիշերը։
«Քիչ առաջ արդյունավետ բանակցություններ եմ վարել Լիբանանի հարգարժան նախագահ Ժոզեֆ Աունի և Իսրայելի վարչապետ Բիբի Նեթանյահուի հետ։ Երկու առաջնորդներն էլ պայմանավորվել են, որ իրենց երկրների միջև խաղաղության հասնելու նպատակով պաշտոնապես կհայտարարեն 10-օրյա հրադադար»,- «Meduza»-ի փոխանցմամբ՝ նշել է Թրամփը։
Ապրիլի 14-ին ԱՄՆ-ում տեղի էին ունեցել Իսրայելի և Լիբանանի դիվանագետների ուղիղ բանակցությունները, որոնք առաջինն էին 1993 թվականից ի վեր։
Իսրայելն ու Լիբանանը պաշտոնապես պատերազմական վիճակում են մնում Իսրայելի պետության ստեղծման՝ 1948 թվականից սկսած։
Հիշեցնենք, որ ապրիլի 8-ի գիշերը ԱՄՆ-ն ու Իրանը հայտարարել էին, թե համաձայնության են եկել հրադադարի շուրջ։ Սակայն այդ պայմանավորվածությունից հետո էլ Իսրայելը շարունակել էր հարվածներ հասցնել Լիբանանի տարածքին, որտեղ գործում է իրանամետ «Հըզբոլլահ» խմբավորումը։ Ամերիկյան իշխանություններն այդ ժամանակ նշում էին, որ հրադադարը չի տարածվում Լիբանանի վրա։
Իսրայելն իր հերթին ընդգծել էր, որ պատերազմում է ոչ թե Լիբանանի, այլ հենց Լիբանանի տարածքում գործող «Հըզբոլլահ» խմբավորման դեմ։
Լիբանանը պաշտոնապես չի ճանաչում Իսրայել պետությունը։
