24.06.2026 | 19:55
Նավթային գերտերություն՝ առանց բենզինի․ ինչ է կատարվում Ռուսաստանում. ՏԵՍԱՆՅՈւԹ
Ի՞նչ են հայտարարագրել ԱԻՄ-ը և ԴՕԿ-ը
Քաղաքականություն
13.04.2026 | 17:40
2026 թվականի խորհրդարանական ընտրություններին մասնակցելու մասին հայտարարած, հետախուզման մեջ գտնվող նախկին ռազմական ոստիկան Վարդան Ղուկասյանի «Դեմոկրատիա, օրենք և կարգապահություն» (ԴՕԿ) կուսակցությունն անցած տարի որևէ ֆինանսավորում չի ունեցել, այդ թվում՝ անդամավճարներ չի ստացել։ Կուսակցության 2025 թվականի տարեկան հաշվետվության համաձայն՝ այն նաև չի կատարել որևէ ծախս։
ԴՕԿ-ը չունի ո՛չ անշարժ, ո՛չ շարժական գույք։ Կուսակցության մշտապես գործող ղեկավար մարմնի անդամները 3-ն են՝ Արսեն Կյուրեղյան, Արտյոմ Դավթյան և Անույշ Խուդավերդյան։
Առաջիկա ընտրություններում ԴՕԿ-ի գործընկեր Պարույր Հայրիկյանի «Ազգային ինքնորոշում միավորում» կուսակցությունը 2025 թվականին ծախսել է 216 հազար դրամ՝ մարտին անցկացված համագումարի համար։ Եվս 66 հազար դրամ ԱԻՄ-ը ծախսել է ընթացիկ կարիքների համար։
Կուսակցության մուտքերը կազմել են ընդամենը 150 հազար դրամ։ Ընդ որում, այդ 150 հազար դրամը նախ կանխիկացվել է՝ համագումարի պատվիրակների ճանապարհածախսը հոգալու համար, սակայն պատասխանատուները պարզել են, որ կուսակցության ծախսերը կարող են լինել միայն անկանխիկ, և գումարը կրկին մուտք է արվել հաշվին։
Հիշեցնենք, որ օրեր առաջ Պարույր Հայրիկյանը և Վարդան Ղուկասյանը հաստատել են, որ առաջիկա խորհրդարանական ընտրություններին մասնակցելու են միասին։
Գայանե Խաչատրյան
