Կոնֆլիկտների ու կիբերբուլինգների դեպքերը նվազել են հեռախոսների օգտագործման սահմանափակմամբ․ ՏԵՍԱՆՅՈՒԹ

Երևանի քաղաքապետարանի այսօրվա գործակարգավարական խորհրդակցության ժամանակ ներկայացվեցին դպրոցներում բջջային հեռախոսների օգտագործման սահմանափակման արդյունքները։ Քաղաքապետարանի հանրակրթության վարչության պետի պաշտոնակատար Մարգարիտա Խաչատրյանը տեղեկացրեց, որ ուսումնասիրությունն իրականացվել է շուրջ 20 հազար հարցվողի շրջանում՝ ընդգրկելով աշակերտների, ուսուցիչների, վարչական աշխատակիցների և ծնողների։ Հարցումն ուղղված է եղել պարզելու, թե ինչպես է սահմանափակումն ազդում ուսումնական գործընթացի, կարգապահության և դպրոցական միջավայրի վրա։

Ըստ ներկայացված տվյալների՝ սահմանափակումը հիմնականում դրական է ընկալվել բոլոր խմբերի կողմից։ Այն նպաստել է դասերի ընթացքում աշակերտների ուշադրության կենտրոնացմանը և կարգապահության ամրապնդմանը։

Հարցման արդյունքներով՝

• 82%-ից ավելի պատասխաններ ցույց են տալիս, որ սահմանափակումը դրական է ազդում աշակերտների ուշադրության վրա,
• մոտ նույն մակարդակի գնահատականներ են տրվել նաև կարգապահության բարելավման մասով,
• աշակերտների գրեթե կեսը նշել է, որ սահմանափակումը դրական ազդեցություն ունի առաջադիմության վրա։

«Արձանագրենք, որ բջջայինների սահմանափակումը դպրոցներում և՛ ծնողների, և՛ սովորողների, և՛ ուսուցիչների գերակշիռ մեծամասնության գնահատմամբ ճիշտ քայլ է եղել և կարծում եմ, որ սա այն կարևոր և առաջնային պարզ քայլերից էր, որ մենք պարտավոր էինք իրականացնել և շատ ուրախալի է, որ արդյունքները բոլորի կողմից դրական են գնահատվում»,- ընդգծեց Ավինյանը։

Հարցվածների 63.4%-ը նշել է,  որ դպրոցներում նվազել են առցանց կոնֆլիկտների և կիբերբուլինգի դեպքերը։

Մանրամասները՝ տեսանյութում։