Հունգարիայում ընդդիմությունն առաջին անգամ 16 տարվա ընթացքում կարող է առաջ անցնել Օրբանից․ առավոտյան ընտրողների մասնակցությունը պատմական ռեկորդ է սահմանել

Այսօր առավոտյան Հունգարիայում սկսվել են խորհրդարանական ընտրությունները։ Ընտրատեղամասերը բացվել են Կենտրոնական Եվրոպայի ժամանակով 06:00-ին։ Արդեն բացվելուց մեկ ժամ անց մասնակցությունը գերազանցել է 3%-ը, իսկ ժամը 9:00-ին մոտեցել է 17%-ի՝ ինչը այս ժամի համար երկրի ժամանակակից պատմության ամենաբարձր ցուցանիշն է։ Նախորդ ընտրությունների ժամանակ ժամը 9:00-ին քվեարկել էր ընտրողների փոքր-ինչ ավելի քան 10%-ը, հայտնում է The Insider-ը։

Իշխող «Ֆիդես» կուսակցության նախընտրական շտաբի ղեկավար Բալաժ Օրբանը կարծում է, որ բարձր մասնակցությունը ձեռնտու է իրենց կուսակցությանը․ «Բարձր մասնակցությունը միշտ ձեռնտու է եղել իշխանական կուսակցությանը, և այժմ իրավիճակն այնպիսին է, որ «Տիսայի» կողմնակիցները ամբողջ քարոզարշավի ընթացքում շատ ակտիվ էին, մինչդեռ իշխանության կողմնակիցների ակտիվությունը հարցեր էր առաջացնում։ Հիմա, կարծես, մոբիլիզացվել են նաև աջ ընտրողները։ Հիմա մեր հերթն է»։

Միևնույն ժամանակ, «Ընտրական ժողովրդավարություն» նախագծի վերլուծաբան Մատյաշ Բոդիի խոսքով՝ Բուդապեշտում քվեարկության առաջին ժամին գրանցվել է հատկապես բարձր ակտիվություն, մինչդեռ ամենացածր ցուցանիշները նկատվել են փոքր բնակավայրերում, որոնք համարվում են Օրբանի կուսակցության կարևոր ընտրական բազա։

«Եթե ես լինեի «Ֆիդես»-ի շտաբի ղեկավար, վստահ չէի լինի, որ ուրախ եմ նման արդյունքներից»,- նշել է Բոդին։

Մի շարք հարցումների համաձայն՝ «Ֆիդես»-ի աջակցությունը ցածր է, քան ընդդիմությանը, և կուսակցությունն արդեն հայտարարել է ընտրատեղամասերում հարյուրավոր խախտումների մասին։ Եվրոպական խորհրդարանի պատգամավոր Չաբա Դյոմյոտյորը մեղադրել է ընդդիմադիր «Տիսա» կուսակցությանը «ընտրական կեղծիքների փորձերի» համար։

Գործող վարչապետ Վիկտոր Օրբանի գլխավոր մրցակիցը՝ «Տիսա» կուսակցության առաջնորդ Պետեր Մագյարը, հայտարարել է, որ սպասում է հաղթանակի․ «Ոչ ոք լուրջ չի կարող մտածել, որ «Տիսան», և դրա հետ միասին Հունգարիան, չեն հաղթի ընտրություններում»։

Մագյարը նաև նշել է, որ կընդունի ընտրությունների արդյունքները միայն լուրջ խախտումների բացակայության դեպքում։ Նրա խոսքով՝ կուսակցությունն արդեն ստացել է ընտրողների տասնյակ բողոքներ։

Ընտրատեղամասերը բաց կլինեն մինչև ժամը 19:00-ը։ Քաղաքացիները պետք է տան երկու ձայն՝ մեկ՝ միանձնյա ընտրատարածքի թեկնածուի օգտին, և մեկ՝ կուսակցական ցուցակի համար։ Ընտրություններին մասնակցում են հինգ քաղաքական ուժեր, որոնցից յուրաքանչյուրն պետք է հաղթահարի 5%-անոց շեմը՝ խորհրդարան անցնելու համար։ Հարցումների համաձայն՝ երկու խոշոր կուսակցություններից բացի, խորհրդարան անցնելու հնարավորություն ունի միայն ծայրահեղ աջ «Մեր հայրենիք» կուսակցությունը։

Անկախ հարցումները կանխատեսում են «Տիսայի» հաղթանակը, սակայն իշխանություններին մոտ վերլուծաբանները կարծում են, որ Օրբանի «Ֆիդես»-ը կպահպանի խորհրդարանական մեծամասնությունը։

Ընտրություններից առաջ Հունգարիայում ծավալվել է կոշտ քաղաքական պայքար։ Իշխանությունները և ընդդիմությունը փոխադարձ մեղադրանքներ են հնչեցնում արտաքին ազդեցության և միջամտության փորձերի վերաբերյալ։ «Տիսա» կուսակցության առաջնորդ Պետեր Մագյարը պնդում է, որ վարչապետ Վիկտոր Օրբանի շրջապատը կապված է Ռուսաստանի հետ և օգտագործում է նրա աջակցությունը՝ իշխանությունը պահպանելու համար։ Իր հերթին «Ֆիդես»-ի ներկայացուցիչները մեղադրում են ընդդիմությանը Բրյուսելի և Կիևի շահերին ծառայելու և երկիրը Ուկրաինայի պատերազմում ներգրավելու փորձերի մեջ։