26.10.2026 | 22:13
ՄԱԿ-ի հանձնաժողովը Ռուսաստանին մեղադրել է մարդկության դեմ հանցագործությունների և մարդկանց առևտրի մեջ
250 մլն դրամ՝ Իրանում պատերազմի պատճառով այլ չվերթներով ՀՀ վերադարձած քաղաքացիների համար․ հրապարակվել է փոխհատուցումներ ստանալու կարգը
Հասարակություն
09.04.2026 | 10:17
Պետական բյուջեից մինչև 250 մլն դրամ կհատկացվի 1080 ՀՀ քաղաքացիներին, որոնք Մերձավոր Արևելքում սկսված պատերազմի պատճառով չեն կարողացել կանոնավոր չվերթներով վերադառնալ Հայաստան։ Այս մասին Factor.am-ը տեղեկանում է ՀՀ ԱԳՆ-ի հրապարակած փաստաթղթերից։
Նշվում է, որ ՀՀ արտաքին գործերի նախարարությունը կազմակերպել է քաղաքացիների վերադարձը՝ ապահովելով թռիչքների թույլտվություններ Օմանից, Լիբանանից և Հնդկաստանից։
ԱՄԷ-ից դեպի Օման կազմակերպվել է անվճար տեղափոխում․ մարտի 4–10-ն ընկած ժամանակահատվածում իրականացված 5 չվերթով Օման է տեղափոխվել 253 ՀՀ քաղաքացի։ Մարտի 2–12-ը՝ Մասկատ–Երևան չվերթով վերադարձել է 550 քաղաքացի, իսկ մարտի 3–16-ը՝ Դուբայ–Երևան ուղղությամբ՝ շուրջ 1030 քաղաքացի։
Մարտի 19-ի տվյալներով՝ դիվանագիտական ներկայացուցչություններին դիմել է շուրջ 1080 քաղաքացի, այդ թվում՝ ուսանողներ Իսրայելից, Կատարից և Քուվեյթից։
Կառավարությունը նախատեսում է փոխհատուցում տրամադրել այն քաղաքացիներին, որոնց չվերթները չեղարկվել են․ յուրաքանչյուր անձի համար մինչև 250 հազար դրամ։ Ծրագիրը կտարածվի 2026 թվականի փետրվարի 28-ից մարտի 25-ն ընկած ժամանակահատվածում գնված տոմսերի վրա։ Հայտերը ներկայացվելու են e-request.am հարթակով, իսկ հաստատված գումարները կփոխանցվեն 5 օրվա ընթացքում։
Ծրագրի իրականացման համար նախատեսվում է մինչև 250 մլն դրամ հատկացնել պետական բյուջեից։
Նարեկ Կիրակոսյան
