Պանրի ու երշիկի տեսականի, պաշտետ, սև ու կարմիր ձկնկիթ․ ԱԳՆ արարողակարգի ծառայության պետը նվեր է ստացել ռուսաստանցի գործընկերոջից

Նկարը գեներացված է արհեստական բանականության միջոցով

3 շիշ գինի, 3 հատ երշիկի տեսականի, 3 տուփ ծխեցված ձկան տեսականի, մեկական տարա կարմիր և սև ձկնկիթ. ՌԴ նախագահի աշխատակազմի ղեկավար Վլադիսլավ Կիտաևն այս ամենը նվիրել է ՀՀ ԱԳՆ պետական արարողակարգի ծառայության պետ Գագիկ Վանոյանին։ Այս մասին Factor.am-ը տեղեկանում է Վանոյանի՝ ԿԿՀ ներկայացրած պաշտոնյայի նվերների հաշվառման ձևաթղթից։ 

Ռուսաստանցի պաշտոնյան փայտե տուփ է տվել, որը իր մեջ ներառել է 3 շիշ գինի, 1 շիշ օղի, 1 շիշ կոնյակ, 4 տուփ պանրի տեսականի, 3 հատ երշիկի տեսականի, 1 հատ պաշտետ, 3 տուփ ծխեցված ձկան տեսականի, 1 ապակյա տարա ծովախեցգետնի ձողիկներ, 1 ապակյա տարա կարմիր ձկնկիթ և 1 տարա սև ձկնկիթ:

Նվերի ընդհանուր արժեքը գնահատվել է 336,500 դրամ։ Ձևաթղթում նշվում է, որ գնորոշման համար հիմք են հանդիսացել մի քանի բաց աղբյուրներից վերցված գների միջինացված արժեքները։ 

Հիշեցնենք՝ «Հանրային ծառայության մասին» օրենքը սահմանում է հանրային ծառայողների կողմից նվերներ ընդունելու վերաբերյալ  կանոններ։  

Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:  

Նախատեսված չափը գերազանցող նվերը հաշվառվելուց հետո որոշ ժամանակ անց փոխանցվում է Պետական գույքի պահպանման կոմիտեին, որը և որոշում է դրա հետագա ճակատագիրը։

Անի Թամրազյան