ԱՄՆ-ն ու Իրանը համաձայնության են եկել երկշաբաթյա հրադադարի շուրջ

Միացյալ Նահանգները երկու շաբաթով դադարեցնում է «Իրանի  ռմբակոծություններն ու հարձակումները»՝ Պակիստանի հետ խորհրդակցություններից հետո, այն պայմանով, որ նույն ժամանակահատվածում ապահովվի նավերի անարգել անցումը Հորմուզի նեղուցով։ Այս մասին հայտարարել է ԱՄՆ նախագահ Դոնալդ Թրամփը TruthSocial-ում։

Իր հայտարարության մեջ Թրամփը մեջբերել է Պակիստանի վարչապետ Շեհբազ Շարիֆի խնդրանքը՝ «զսպել այն կործանարար ուժը, որը երեկ երեկոյան շարժվում էր դեպի Իրան»։ Սպիտակ տան ղեկավարը նաև նշել է, որ ԱՄՆ-ի կողմից հրադադարի ռեժիմը պայմանավորված է նրանով, որ «մենք արդեն հասել և գերազանցել ենք բոլոր ռազմական նպատակները»։

Ըստ Թրամփի`Իրանի հետ վերջնական, երկարաժամկետ խաղաղության համաձայնագրի շուրջ աշխատանքը նույնպես արդյունավետորեն ընթանում է։ «Մենք ստացել ենք Իրանից 10 կետից բաղկացած առաջարկ և կարծում ենք, որ դա բանակցությունների համար գործնական հիմք է։ Վիճելի  գրեթե բոլոր հարցերի շուրջ համաձայնություն է ձեռք բերվել ԱՄՆ-ի և Իրանի միջև, բայց երկշաբաթյա ժամանակահատվածը թույլ կտա վերջնականապես ավարտել համաձայնագիրը»։

ԱՄՆ վարչակազմի մի պաշտոնյա The New York Times-ին  ասել է, որ Իրանի դեմ ամերիկյան ռազմական հարվածներն արդեն դադարեցվել են։

Իսրայելը նույնպես կմիանա Իրանի դեմ երկշաբաթյա հրադադարին, հաղորդում է CNN-ը՝ հղում անելով Սպիտակ տան պաշտոնյային։

Թեհրանը հաստատել է հրադադարի իր պատրաստակամությունը, հայտնում է  պետական Fars լրատվական գործակալությունը։ Հայտարարության մեջ նշվում է, որ Իրանը «մեծ հաղթանակ» է տարել Միացյալ Նահանգների նկատմամբ՝ ստիպելով Վաշինգտոնին ընդունել պատերազմի լիակատար դադարեցման իր տասը կետանոց ծրագիրը, այլ ոչ թե կարճաժամկետ հրադադար։ Իրանը նախկինում այս ծրագիրը Միացյալ Նահանգներին էր փոխանցել Պակիստանի միջոցով։ Դրա կետերի թվում են Իսլամական Հանրապետության դեմ պատժամիջոցների վերացումը և Հորմուզի նեղուցով անցնող նավերի համար վճարի սահմանումը։

Իրանի արտաքին գործերի նախարար Աբբաս Արաղչին հայտարարել է, որ Հորմուզի նեղուցը երկու շաբաթվա ընթացքում կվերաբացվի նավերի անվտանգ անցման համար՝ Իրանի զինված ուժերի հետ համակարգված և տեխնիկական սահմանափակումները հաշվի առնելով։

ԱՄՆ-Իրան բանակցությունները տեղի կունենան ապրիլի 10-ին Իսլամաբադում՝ «ամերիկյան կողմի նկատմամբ լիակատար անվստահությամբ», – հայտարարել է Իրանի Ազգային անվտանգության գերագույն խորհուրդը։

Թարգմանությունը`Էմմա Չոբանյանի