Քննիչի հասցեին վիրավորանքներ ու խուլիգանություն․ գործը՝ դատարանում

Հակակոռուպցիոն կոմիտեն դատարան է ուղարկել այն քաղաքացու վերաբերյալ քրեական վարույթը, որը, ըստ նախաքննության, սոցիալական ցանցում վիրավորել է քննիչին և նրա ընտանիքի անդամներին՝ միաժամանակ կատարելով խուլիգանություն տեղեկատվական տեխնոլոգիաների կիրառմամբ։  ՔԿ-ից հայտնում են, որ նրա նկատմամբ որպես խափանման միջոց կիրառվել է կալանքը։

«ՀՀ հակակոռուպցիոն կոմիտեում ՀՀ  քննչական կոմիտեից ստացված հաղորդման հիման վրա նախաձեռնված քրեական վարույթով իրականացված նախաքննությամբ պարզվել է, որ քաղաքացին ՀՀ ՔԿ քննիչի օրինական ծառայողական գործունեության կապակցությամբ հրապարակել է նրա իրավունքներին ու օրինական շահերին վնաս պատճառող տեղեկություններ, ինչպես նաև հաղորդակցական տեխնոլոգիաներն օգտագործելով՝ կատարել է խուլիգանություն:

Մասնավորապես՝ նախաքննությամբ պարզվել է, որ հիշյալ անձն իր վերաբերյալ ՔԿ համապատասխան քննչական վարչության քննիչի կողմից քննված և 2024 թվականի մայիսի 31-ին կայացված կարճման որոշման կապակցությամբ, տեղեկատվական և հաղորդակցական տեխնոլոգիաներն օգտագործելով, իր անձնական ֆեյսբուքյան էջի սոցիալական բաց հարթակում խոսելով հիշյալ քրեական վարույթի մասին, անպարկեշտ արտահայտություններ ու հայհոյանքներ է հնչեցրել քննիչի և նրա ընտանիքի անդամների հասցեին՝ այդ կերպ հրապարակայնորեն նսեմացնելով պետական ծառայողի պատիվն ու արժանապատվությունը, հասարակության նկատմամբ դրսևորելով անհարգալից, իսկ բարոյական ու իրավական նորմերի նկատմամբ՝ բացահայտ արհամարհական վերաբերմունք:

Քաղաքացուն մեղադրանք է ներկայացվել ՀՀ քրեական օրենսգրքի  297-րդ հոդվածի 2-րդ մասի 3-րդ կետով և ՀՀ քրեական օրենսգրքի 490-րդ հոդվածի 2-րդ մասով: Նրա նկատմամբ որպես խափանման միջոց է կիրառվել կալանքը:

Քրեական վարույթի նախաքննությունը ավարտվել է, և վարույթի նյութերը մեղադրական եզրակացությամբ ուղարկվել են իրավասու դատարան»,- ասված է հաղորդագրությունում։