Դատախազությունը «Խնձորի գործով» վճռաբեկ բողոք է ներկայացրել

Դատախազությունը բողոքարկել է «Խնձորի գործով» արդարացման դատավճիռն անփոփոխ թողնելու վերաբերյալ Վերաքննիչ դատարանի դատական ակտը: Այս մասին Factor TV-ի հարցին ի պատասխան հայտնում են Դատախազությունից:

Հիշեցnենք, որ 72-ամյա, Արցախից բռնի տեղահանված Ալբերտ Առստամյանը մեղադրվում է խուլիգանության համար։ Նա, ըստ գործի, տեսնելով վարչապետ Նիկոլ Փաշինյանին` 9-րդ հարկի տան պատշգամբից խնձոր է նետել Փաշինյանի ուղղությամբ ու հայհոյանքներ հնչեցրել։ Այս արարքով, ըստ մեղադրանքի կողմի, Առստամյանը բացահայտ անհարգալից վերաբերմունք է դրսևորել հասարակության նկատմամբ, խաթարել հասարակության անդորրը։ Մինչդեռ Առստամյանը հայտարարել է, որ ինքը քաղաքական ակցիա է իրականացրել և միտում չի ունեցել վնասելու որևէ մեկին։ Առաջին ատյանի դատարանի դատավոր Արման Հովհաննիսյանն արդարացրել է Առստամյանին՝ համարելով, որ նրա արարքում առկա չէ խուլիգանության հանցակազմ, բայց դատախազությունը բողոքարկել է դատական ակտը։

Այս դատական ակտի դեմ բողոք է ներկայացվել Վերաքննիչ դատարան, որով Վերաքննիչ դատարանը պահանջում էր ամբողջությամբ բեկանել Առստամյանին արդարացնելու դատավճիռն ու գործն ուղարկել առաջին ատյանի դատարան՝ նոր քննության: 2025-ի նոյեմբերի 27-ին Վերաքննիչ քրեական դատարանը՝ նախագահությամբ դատավոր Վաչե Մարգարյանի, կազմով՝ դատավորներ Նարինե Հովակիմյանի և Էդգար Մանասյանի, մերժել են դատախազության բողոքն ու անփոփոխ թողել Ալբերտ Առստամյանին արդարացնելու դատավճիռը:

Արաքս Մամուլյան