Իրանը թույլատրել է հումանիտար օգնությամբ բեռնված նավերի անցումը Հորմուզի նեղուցով

Իրանի իշխանությունները թույլատրել են Հորմուզի նեղուցով անցնել հումանիտար օգնություն տեղափոխող նավերին։ Այս մասին շաբաթ օրը՝ ապրիլի 4-ին, հայտնել է իրանական պետական Tasnim լրատվական գործակալությունը։ Անցումը բաց է առաջին անհրաժեշտության ապրանքներ տեղափոխող նավերի համար, որոնք ուղևորվում են դեպի Իրանի կամ Օմանի ծոցում գտնվող նավահանգիստներ։

Al Jazeera հեռուստաալիքի տվյալներով՝ մոտ ապագայում Թեհրանը կդասակարգի երկրները որպես «թշնամական», «չեզոք» և «բարեկամական»։ «Թշնամական» երկրների նավերին կարգելվի անցնել Հորմուզի նեղուցով, իսկ «չեզոք» երկրների նավերը ստիպված կլինեն վճարել հատուկ վճար, գրում է Al Jazeera-ն։

Նախօրեին Մեծ Բրիտանիան կազմակերպել էր հանդիպում՝ ԱՄՆ դաշնակից երկրների ավելի քան 40 ներկայացուցիչների մասնակցությամբ Եվրոպայից, Ասիայից և Մերձավոր Արևելքից՝ քննարկելու նեղուցի շրջափակումը վերացնելու ծրագրերը։ Reuters-ի տվյալներով՝ հանդիպման մասնակիցները գտնում են, որ Թեհրանը չպետք է հնարավորություն ունենա սահմանելու վճար նավերի անցման համար։

Մարտի 25-ին Իրանը թույլատրել էր «բարեկամական» երկրների՝ Ռուսաստանի, Չինաստանի, Պակիստանի, Հնդկաստանի և Իրաքի նավերին անցնել Հորմուզի նեղուցով։

Ավելի վաղ Reuters գործակալությունը, հղում անելով աղբյուրներին, հայտնել էր, որ ամերիկյան հետախուզության գնահատմամբ Իրանը մոտ ժամանակում դժվար թե բացի նեղուցը, քանի որ աշխարհի ամենակարևոր նավթային արտահանման ուղիներից մեկի նկատմամբ վերահսկողությունը Միացյալ Նահանգների վրա ճնշում գործադրելու նրա միակ իրական լծակն է։

Աղբյուրների տվյալներով՝ Թեհրանը, ամենայն հավանականությամբ, կշարունակի սահմանափակել նավարկությունը նեղուցում՝ էներգակիրների բարձր գները պահպանելու և այդ կերպ ԱՄՆ նախագահ Դոնալդ Թրամփի վրա ճնշում գործադրելու համար։