«Հայոց Համազգային Միասնությունը» չի մասնակցի ընտրություններին․ Միհրան Պողողսյանը կոչ է անում այլ ուժի ձայնը տալ

«Հայոց Համազգային Միասնություն» կուսակցությունը, մի կողմ դնելով կուսակցական, անձնական շահերը և նպատակ ունենալով նպաստել ընդդիմադիր ձայների կոնսոլիդացմանը, որպես առանձին քաղաքական միավոր չի առաջադրվելու ԱԺ ընտրություններին։ Այս մասին հայտարարել է կուսակցության նախագահ, ԴԱՀԿ նախկին ղեկավար Միհրան Պողոսյանը։

«Կուսակցությունը դրական է գնահատում Գագիկ Ծառուկյանի գլխավորած «Բարգավաճ Հայաստան» կուսակցության, բազմաթիվ ուժերի, մասնագիտական խմբերի և հանրության լայն շրջանակների կողմից ներկայացրած «Առաջարկ Հայաստանին» ծրագիրը:

Մենք կոչ ենք անում ՀՀ քաղաքացիներին, կուսակցության համակիրներին խորհրդարանական ընտրություններում քվեարկել «Բարգավաճ Հայաստան» կուսակցության օգտին»,-նշվում է հայտարարության մեջ։

Հիշեցնենք՝ Պողոսյանն ավելի վաղ հայտարարել էր, որ կուսակցությունը պարտադիր կմասնակցի 2026 թվակականի հունիսի 7-ին կայանալիք Ազգային ժողովի ընտրություններին․ «Մենք մասնակցելու ենք միասնական ճակատով՝ մեծ կոսոլիդացիայով»։

Պողոսյանը մեկն է ՀՀ նախկին բարձրաստիճան պաշտոնյաներից, որոնց նկատմամբ հետախուզում է հայտարարված և որոնք ապաստան են գտել Ռուսաստանում։ ՌԴ վերջիններիս Հայաստանին չի արտահանձնում։

Պողոսյանին ՀՀ-ում մի շարք դրվագներով մեղադրանքներ են առաջադրվել։ Խոշոր չափերով գույքի հափշտակություն, պաշտոնեական լիազորությունների չարաշահում, ավելի քան մեկ միլիոն դոլարի փողերի լվացում։ 2023-ի մայիսի 17-ին Ազգային անվտանգության ծառայությունը հայտարարեց մեկ տոննա կոկաինի ներմուծման փորձ բացահայտելու մասին։ Պողոսյանին մեղադրանք առաջադրվեց նաև 250 միլիոն եվրոյի թմրամիջոցի մաքսանենգության գործով։

ԴԱՀԿ նախկին ղեկավարի անունը կոռուպցիոն սկանդալների հետ էր կապվում նաև մինչև 2018-ի հեղափոխությունը։ Ամենաաղմկահարույց սկանդալը, որում շոշափվել է Միհրան Պողոսյանի անունը, 2016 թվականի «Պանամայի փաստաթղթերի» արտահոսքն էր։ Պողոսյանը, լինելով ԴԱՀԿ պետ, Պանամայում գրանցված երեք օֆշորային ընկերությունների բաժնետեր էր, շվեյցարական բանկերում այդ ընկերություններից երկուսի հաշիվները տնօրինելու բացառիկ իրավունք ուներ։

Երկար տարիներ Միհրան Պողոսյանին էին վերագրում նաև Հայաստան բանանի ներմուծման ոլորտում փաստացի մենաշնորհի ստեղծումն ու պահպանումը՝ իրեն պատկանող «Քեթրին Գրուպ» ընկերության միջոցով։ Դեռևս 2022-ին դատախազությունը դատարան է դիմել և պահանջել բռնագանձել Պողոսյանին պատկանող ենթադրյալ ապօրինի ծագում ունեցող գույքը։

Եվգենյա Համբարձումյան