26.10.2026 | 22:57
Իրանը, Պակիստանը, Թուրքիան և Սաուդյան Արաբիան քառակողմ հանդիպում են անցկացրել․ քննարկվել է տարածաշրջանային անվտանգությունը
Սերժ Սարգսյանը կկարողանա անարգել դուրս գալ Հայաստանից․ Դատախազությունը չի բողոքարկել նրա խափանման միջոցը վերացնելու որոշումը
Հասարակություն
02.04.2026 | 12:45
Հսկող դատախազը չի բողոքարկել Հայաստանի երրորդ նախագահ Սերժ Սարգսյանի նկատմամբ ընտրված խափանման միջոց բացակայելու արգելքը վերացնելու որոշումը։ Այս մասին Factor TV-ի գրավոր հարցմանն ի պատասխան հայտնում են կառույցից։
«Ի պատասխան Ձեր հարցման՝ տեղեկացնում եմ, որ, նկատի ունենալով այն հանգամանքը, որ բացակայելու արգելք խափանման միջոց կիրառելու հիմքը Հակակոռուպցիոն դատարանի որոշման կայացման պահին արդեն իսկ վերացած է եղել, ուստի՝ հսկող դատախազը Դատարանի հիշյալ որոշումը չի բողոքարկել»,- հայտնում են կառույցից։
Հիշեցնենք, որ 2026-ի փետրվարին Հակակոռուպցիոն դատարանի դատավոր Վարդգես Սարգսյանը, քննելով Սերժ Սարգսյանի պաշտպանների բողոքը, վարույթն իրականացնող մարմնին պարտավորեցրել էր վերացնել Սարգսյանի նկատմամբ ընտրված բացակայելու արգելք խափանման միջոցը։ Թեև որոշումից հետո Դատախազությունը, ի պատասխան ԶԼՄ-ների հարցումների, հայտնել էր, որ կբողոքարկի որոշումը՝ այն, փաստորեն, չի բողոքարկվել։
Սերժ Սարգսյանի վերաբերյալ այս պահին երեք գործ կա Հակակոռուպցիոն դատարանում, ևս մեկը՝ Հակակոռուպցիոն կոմիտեում։
Այն բանից հետո, երբ դատարանում գտնվող գործերով դատավորները որոշել էին վերացնել Սարգսյանի նկատմամբ ընտրված բացակայելու արգելք խափանման միջոցը, և, փաստացի, ստեղծվել էր իրավիճակ, որ այդ գործերով նրա նկատմամբ խափանման միջոց ընտրված չէր, Դատախազությունը Սարգսյանի նկատմամբ Հակակոռուպցիոն կոմիտեում քննվող գործով հանրային քրեական հետապնդում հարուցելու որոշում էր կայացրել։ Սարգսյանի նկատմամբ կրկին խափանման միջոց էր ընտրվել բացակայելու արգելքը։ Հենց այս որոշումն էր բողոքարկվել դատարանում, որով դատարանը վարույթն իրականացնող մարմնին պարտավորեցրել է վերացնել Սարգսյանի խափանման միջոցը։
Արաքս Մամուլյան
