Փաշինյանը եկեղեցու միջադեպի քրեական վարույթով տուժող ճանաչվե՞լ է․ ՔԿ-ն չի մանրամասնում

Քննչական կոմիտեն չի հայտնում՝ արդյոք եկեղեցու միջադեպի քրեական վարույթով Նիկոլ Փաշինյանը տուժող է ճանաչվել։ Factor.am-ը իրավապահ կառույցից հետաքրքրվել էր՝ արդյոք գործով որևէ տուժող կա։

ՔԿ մամուլի քարտուղարը մեր հարցին ի պատասխան միայն ասաց, որ հավելյալ ինֆորմացիա չեն տրամադրում առավոտյան տարածած՝ միջադեպի մասնակիցների նկատմամբ հանրային քրեական հետապնդում հարուցելու մասին հաղորդագրությունից զատ։

Հիշեցնենք, որ կիրակի Սուրբ Աննա եկեղեցում պատարագի ժամանակ, որին մասնակցում էր նաև վարչապետ Նիկոլ Փաշինյանը, միջադեպ էր տեղի ունեցել։ Այն պահին, երբ Փաշինյանի անվտանգության աշխատակիցները ճանապարհ էին բացում, որպեսզի նա դուրս գար, մի երիտասարդ նախ ընդդիմացավ, ապա փորձեց ձեռքով հարվածել վարչապետին։ Այդ երիտասարդը 18-ամյա Դավիթ Մինասյանն է, որին մեղադրանք է ներկայացվել խուլիգանության և պաշտոնատար անձի օրինական ծառայողական կամ քաղաքական գործունեությանը միջամտելու համար։ Նրան կալանավորելու միջնորդություն է ներկայացվել։ Գործը մակագրվել է դատավոր Մնացական Մարտիրոսյանին։

Միջադեպի մյուս մասնակիցները՝ Դավիթ Մինասյանի եղբայր Միքայել Մինասյանն ու Գևորգ Գևորգյանն ազատ են արձակվել։ Վերջինի նկատմամբ կիրառվել է 5 մլն դրամ գրավ ու բացակայելու արգելք, իսկ Միքայել Մինասյանի նկատմամբ՝ միայն բացակայելու արգելք։ Նա մեղադրվում է այդ գործողություններին աջակցելու համար, իսկ Գևորգյանն այդ ամենը կազմակերպելու համար։ Գևորգ Գևորգյանը հերքել է միջադեպի կազմակերպված լինելն ու հայտնել, որ չի ընդունում ներկայացված մեղադրանքները։ Միքայել Մինասյանն էլ միայն նշել է, որ լավ է և իրեն լավ են վերաբերվել։

Արփի Հակոբյան