Եկեղեցում միջադեպի գործով անցնող երկվորյակներին տանում են մեղադրանք առաջադրելու

«Սուրբ Աննա» եկեղեցում միջադեպի գործով երկվորյակ եղբայրների գործը տեղափոխվել է Երևանի քննչական վարչություն: Քիչ անց պատրաստվում են նրանց մեղադրանք առաջադրել: Այս մասին Factor TV-ին ասաց պաշտպան Վարդուհի Էլբակյանը:

Փաստաբանի խոսքով՝ իրենք մամուլից են տեղեկացել, որ տղաների նկատմամբ հանրային քրեական հետապնդում հարուցելու որոշում է կայացվել: Գործով երրորդ մեղադրյալը Գևորգ Գևորգյանն է:

Նշենք, որ քիչ առաջ Քննչական կոմիտեն հայտարարություն էր տարածել այն մասին, որ եկեղեցում տեղի ունեցած միջադեպի առթիվ նախաձեռնված քրեական վարույթի նախաքննության ընթացքում Դ.Մ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը), Մ.Մ.-ի նկատմամբ՝ 46-297-րդ հոդվածի 1-ին մասով (խուլիգանությանն աջակցելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելուն աջակցելը) և Գ.Գ.-ի նկատմամբ՝ 46-297-րդ հոդվածի 1-ին մասով (խուլիգանությունը կազմակերպելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելը):

Քննչական կոմիտե տարածած հաղորդագրությունից կարելի է եզրահանգել, որ, ըստ վարույթն իրականացնող մարմնի, եկեղեցում տեղի ունեցածը ոչ թե ինքնաբուխ, այլ նախապես ծրագրված միջադեպ է եղել։

Արաքս Մամուլյան