Անի Սամսոնյանին հետամտելու դեպքով նախաքննությունն ավարտվել է. մեղադրյալը տնային կալանքի տակ է

«Լուսավոր Հայաստան» կուսակցության նախկին անդամ, նախկին պատգամավոր Անի Սամսոնյանին հետամտելու վերաբերյալ քրեական վարույթի նախաքննությունն ավարտվել է: Այս մասին Factor TV-ի հարցմանն ի պատասխան հայտնում են Քննչական կոմիտեից:

«Վարույթի նախաքննության ընթացքում Վ.Ա.-ի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 3-րդ կետով (խուլիգանությունը, որը կատարվել է տեղեկատվական կամ հաղորդակցական տեխնոլոգիաներն օգտագործելով) և 196.1-րդ հոդվածի 1-ին մասով (հետամտելը): Վերջինիս նկատմամբ որպես խափանման միջոց կիրառվել է տնային կալանքը և բացակայելու արգելքը: Քրեական վարույթի նախաքննությունն ավարտվել է»,- հայտնում են կառույցից:

Հիշեցնենք, որ Անի Սամսոնյանն ամիսներ առաջ բարձրաձայնել էր այն մասին, որ մի տղամարդ իրեն հետամտում է և պահանջում դուրս գալ քաղաքականությունից:

Սամսոնյանը, մասնավորապես, հայտնել էր, որ տղամարդը մոտ 8 ամիս շարունակ իր, գործընկերների և ընտանիքի հասցեին սեռական հայհոյանքներ է ուղարկել:

«Սկզբում ես դա դիտարկում էի որպես ժամանակավոր խուլիգանություն, կարծում էի` ինչ-որ կարճ ժամանակ անց, միգուցե, անցնի։ Երբ սկսեց անհանգստացնել նաև իմ քաղաքական գործընկերներին, հասկացա, որ հնարավոր է` կատարի գործողություններ, որոնք դուրս են օնլայն տիրույթից, որոշեցի դիմել դատախազություն։ Նա ինձ ասում էր, որ քաղաքականությունից դուրս գամ, թե չէ «հալս» կտեսնեմ»,- պատմել է

Սամսոնյանը՝ նշելով, որ երբ համացանցում արգելափակել է այդ տղամարդուն, վերջինս ձեռք է բերել իր հեռախոսահամարը, իրեն անհանգստացրել փողոցում, փորձել մուտք գործել նաև իր աշխատավայր:

Արաքս Մամուլյան