ԿԿՀ-ն ուսումնասիրում է մետրոյում Փաշինյանի վարքագիծը

Կոռուպցիայի կանխարգելման հանձնաժողովն ուսումնասիրում է մետրոյում ՀՀ վարչապետ Նիկոլ Փաշինյանի վարքագիծը։ Այս մասին Factor.am–ի հարցմանն ի պատասխան տեղեկացրեցին Կոռուպցիայի կանխարգելման հանձնաժողովից։

Հիշեցնենք՝ մարտի 22-ին Փաշինյանի և Արցախից բռնի տեղահանված Արմինե Մոսիյանի զրույցը մետրոյի վագոնում վեճի էր վերածվել։ Փաշինյանը հունից դուրս էր եկել, բղավելով և մատ թափ տալով էր խոսել կնոջ հետ։ Վարչապետին չէր զսպել նաև կնոջ անչափահաս երեխայի ներկայությունը։

«Ես ձեզ հետ կխոսեմ տենց: Այս քարտեզի մասին տենց քամահրանքով չխոսեք: Մյուս անգամ փախածներով չփորձեք ասել, որ ես Ղարաբաղ եմ տվել»,-ասել էր Նիկոլ Փաշինյանը՝ ցույց տալով վերջին օրերին իր հագուստին փակցրած Հայաստանի քարտեզի տեսքով կրծքանշանը։

Այդ օրը՝ ժամեր շարունակ Փաշինյանը միջադեպին չէր անդրադարձել և ափսոսանքի խոսքեր չէր հայտնել։ Երևանում շրջայցի ավարտին պատասխանելով Factor TV-ի հարցին՝ նշեց, որ ներողություն է խնդրում, եթե իր խոսքերը սխալ են ընկալվել։

Այնուհետ Փաշինյանը միջադեպին անդրադարձավ մեկ այլ ուղիղ եթերում և ֆեյսբուքյան գրառմամբ։ Նա Արմինե Մոսիյանին ու որդուն հրավիրեց կառավարություն, ինչպես նաև պատրաստակամություն հայտնեց հանդիպել նրանց նախընտրած վայրում՝ ներողություն խնդրելու համար, սակայն, բռնի տեղահանված կինն անարձագանք թողեց Փաշինյանի առաջարկը։

Կոռուպցիայի կանխարգելման հանձնաժողովը անցած տարի էլ վարքագծի կանոնների խախտում էր համարել Փաշինյանի մի քանի այլ արտահայտություններ։

Հիշեցնենք՝ խոսքը «դոմփել» և «համբալ» բառերի մասին է։ Բարձրաստիճան պաշտոնյաների վարքին հետևող անձնաժողովը եզրակացությամբ նշել էր, որ «դոմփել» բառը գռեհիկ է, կոպիտ ու անվայելուչ: Այդ բառը Հայաստանի վարչապետը մայիսի 30-ին ֆեյսբուքյան գրառմամբ էր կիրառել՝ հայտարարելով, թե բարձրաստիճան հոգևորականներից մեկը ինտիմ կապերի մեջ է քեռու տիկնոջ հետ։ Փաշինյանը հանձնաժողովի եզրակացությունից հետո ներողություն խնդրեց՝ ֆեյսբուքում նոր գրառում անելով։

Նարեկ Կիրակոսյան