26.10.2026 | 11:41
Կենսաբազմազանության կորուստը նաև տնտեսական և պարենային անվտանգության խնդիր է․ Վահան Կոստանյան
Իրանի սպառնալիքից հետո Հայաստանի ամերիկյան համալսարանում դասերն այսօր առցանց են․ ՏԵՍԱՆՅՈՒԹ
Քաղաքականություն
30.03.2026 | 16:36
Հայաստանի Ամերիկյան համալսարանում այսօր դասերն առցանց են անցկացվում։ Պատճառը, ըստ համալսարանի պաշտոնական հաղորդագրության, Արևմտյան Ասիայի ու Մերձավոր Արևելքի ամերիկյան համալսարանների թիրախավորման վերաբերյալ Իրանի կողմից հնչեցված սպառնալիքներն են։
«Սա պարզապես նախազգուշական միջոցառում է: Համալսարանն ուշադիր հետևում է իրավիճակին և կտեղեկացնի ժամանակացույցի կամ ուսուցման ձևաչափի ցանկացած փոփոխության մասին։ Ցանկանում ենք ընդգծել, որ մեր համալսարանի նկատմամբ որևէ ուղղակի սպառնալիք չի արձանագրվել, և առկա չեն հիմքեր համալսարանի՝ վտանգի մեջ գտնվելու վերաբերյալ, ուստի խուճապի պատճառ չկա»,- ասված է համալսարանի տարածած հաղորդագրության մեջ։
Նախօրեին Իրանը սպառնացել է հարվածներ հասցնել տարածաշրջանում գործող իսրայելական և ամերիկյան համալսարաններին՝ իրանական երկու բուհերի դեմ իրականացված հարձակումներին ի պատասխան։ Արևելագետ Արմեն Պետրոսյանի համոզմամբ՝ այս սպառնալիքը Հայաստանին չի առնչվում։ Ըստ նրա՝ խոսքը վերաբերում է այն պետություններին, որոնց տարածքն օգտագործվում է Իրանի դեմ գործողություններ իրականացնելու համար։
ՀԱՀ-ից Factor TV-ին հայտնեցին, որ համալսարանում տարհանում չի իրականացվել, և այն աշխատակիցները, որոնց ներկայությունն անհրաժեշտ է՝ անկախ դասապրոցեսի առցանց ձևաչափից, այնտեղ են։ Պարզաբանեցին, որ որոշումը համալսարանինն է, և իրավապահ մարմիններին չեն տեղեկացրել այդ մասին։ ՆԳՆ-ից ևս փոխանցեցին, որ դա համալսարանի ներքին որոշումն է, իրենք ահազանգ չունեն։ Համալսարանից վստահեցրին, որ դասերը վաղվանից կրկին առկա կանցկացվեն։
Իրանը պայման էր դրել՝ եթե ԱՄՆ վարչակազմը ցանկանում է, որ տարածաշրջանում իր համալսարանները խուսափեն պատասխան քայլերից, ապա պետք է մինչև մարտի 30-ի կեսօր դատապարտի իրանական համալսարանների ռմբակոծությունները։
Տարածաշրջանում գտնվող ամերիկյան համալսարանների բոլոր աշխատակիցներին, դասախոսներին և ուսանողներին, ինչպես նաև հարակից տարածքների բնակիչներին Իրանը հորդորել է պահպանել առնվազն մեկ կիլոմետր հեռավորություն համալսարանների տարածքներից։ Իրանի տվյալներով՝ հարվածներ են հասցվել Սպահանի տեխնիկական և Թեհրանի գիտության և տեխնոլոգիաների համալսարաններին։
Մանրամասները՝ տեսանյութում։
Անի Թամրազյան
