06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Իրանը սպառնում է հարվածներ հասցնել տարածաշրջանում ԱՄՆ-ի և Իսրայելի համալսարաններին
Քաղաքականություն
29.03.2026 | 19:15
Իրանը սպառնացել է հարվածներ հասցնել տարածաշրջանում գործող իսրայելական և ամերիկյան համալսարաններին՝ որպես պատասխան երկու իրանական բուհերի դեմ իրականացված հարձակումների։ Եթե ԱՄՆ վարչակազմը ցանկանում է, որ տարածաշրջանում իր համալսարանները խուսափեն պատասխան քայլերից, ապա պետք է մինչև մարտի 30-ի կեսօր (Թեհրանի ժամանակով) դատապարտի համալսարանների ռմբակոծությունները։ Այս մասին հաղորդում է Fars գործակալությունը՝ հղում անելով Իսլամական հեղափոխության պահապանների կորպուսի (ԿՍԻՀ) հայտարարությանը X սոցիալական ցանցում։
Տարածաշրջանում գտնվող ամերիկյան համալսարանների բոլոր աշխատակիցներին, դասախոսներին և ուսանողներին, ինչպես նաև հարակից տարածքների բնակիչներին խորհուրդ է տրվում պահպանել առնվազն մեկ կիլոմետր հեռավորություն համալսարանների տարածքներից։
Իրանի տվյալներով՝ հարվածներ են հասցվել Սպահանի տեխնիկական համալսարանին և Թեհրանի գիտության և տեխնոլոգիաների համալսարանին։
Մի շարք ամերիկյան համալսարաններ ունեն տարածաշրջանային մասնաճյուղեր Պարսից ծոցի երկրներում․ մասնավորապես՝ Տեխասի A&M համալսարանը Քաթարում և Նյու Յորքի համալսարանը Արաբական Միացյալ Էմիրություններում։
Միաժամանակ, Բեյրութի ամերիկյան համալսարանը ԿՍԻՀ հայտարարությունից հետո առաջիկա երկու օրերին անցնում է հեռավար ուսուցման։
«Իրանի դեմ ամերիկա-իսրայելական ագրեսիայի իրական նպատակը մեր երկրի գիտական հիմքի և մշակութային ժառանգության ոչնչացումն է՝ համակարգված հարվածներ հասցնելով համալսարաններին, գիտահետազոտական կենտրոններին, պատմական հուշարձաններին և նշանավոր գիտնականներին»,- գրել է Իրանի ԱԳՆ պաշտոնական ներկայացուցիչ Էսմայիլ Բաղային X-ում։
ԱՄՆ-ն և Իսրայելը փետրվարի 28-ին սկսել են ռազմական գործողություններ Մերձավոր Արևելքում՝ ավիահարվածներ հասցնելով Իրանին։ Թեհրանը պատասխանել է հրթիռային և անօդաչու սարքերի հարձակումներով Իսրայելի, Պարսից ծոցի մի շարք երկրների և տարածաշրջանում գտնվող ամերիկյան օբյեկտների դեմ։
