06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
ԱՄՆ-ից 300 մլն դոլարի ներդրում Հայաստանում․ մեկնարկում է Firebird-ի տվյալների կենտրոնի ծրագիրը
Քաղաքականություն
27.03.2026 | 17:45
Հայ-ամերիկյան տնտեսական համագործակցությունը ստանում է գործնական շարունակություն․ հայտարարվել է Firebird ընկերության տվյալների կենտրոնի ծրագրի առաջին փուլի համար 300 միլիոն ԱՄՆ դոլարի ներդրման մասին։ Ներդրումը դիտվում է որպես նախորդ տարվա օգոստոսի 8-ին Վաշինգտոնում անցկացված խաղաղության գագաթնաժողովից հետո երկկողմ համագործակցության կոնկրետ արդյունք և ուղղված է արհեստական բանականության ու կիսահաղորդիչների ոլորտում համատեղ նախաձեռնությունների զարգացմանը։ ՀՀ-ում ԱՄՆ դեսպանությունից հայտնում են, որ ծրագրի իրականացումը նպատակ ունի ամրապնդել Հայաստանի դիրքերը որպես տարածաշրջանային տեխնոլոգիական կենտրոն։
«Հայ-ամերիկյան տնտեսական կապերը շարունակում են խորանալ, որի վառ ապացույցն են նոր ներդրումներն ու համագործակցությունը։
ԱՄՆ գործերի ժամանակավոր հավատարմատար Դեյվիդ Ալենը Հայաստանի Հանրապետության պաշտոնատար անձանց և տեղի ֆինանսական գործընկերների հետ ներկա գտնվեց ստորագրման արարողության, որի ընթացքում հայտարարվեց Firebird-ի տվյալների կենտրոնի ծրագրի առաջին փուլի համար 300 միլիոն ԱՄՆ դոլար հատկացելու մասին, ինչը փաստում է հայ-ամերիկյան երկկողմ գործընկերության նշանակալի առաջընթացը նախորդ տարվա օգոստոսի 8-ի Վաշինգտոնի խաղաղության գագաթնաժողովից հետո։
Այս ներդրումը միտված է ԱԲ-ի և կիսահաղորդիչների ոլորտում նորարարական գործընկերության մասին ՀՀ և ԱՄՆ կառավարությունների միջև ստորագրված փոխըմբռնման հուշագրով սահմանված մեր ընդհանուր տեսլականի կենսագործմանը և թույլ է տալիս Հայաստանին դիրքավորվել որպես տեխնոլոգիական ոլորտի առաջատար տարածաշրջանում։ Հպարտ ենք տեսնել մեր երկկողմ գործընկերության շոշափելի արդյունքները»,- ասված է հաղորդագրությունում։
